Angalasoqannginnera annaasaqaataaqaaq

Pilersuisumi tuniniaanermi aqutsisoq Finn Fabricius oqarpoq, akiitsuutitaqanngitsuni pisiniarfinni tammajuitsussanillu pisiniarfinni ulluni makkunani isaatitsisoqanngivissoq.

- Ilisimaarilluarparput tammajuitsussanik pisiniarfimmi akitsuutitaqanngitsunilu pisiniarfinni isertitassarigaluatsinnik ullormut qanoq annertutigisumik annaasaqassanerluta. Naatsorsuinitsinni paasivarput ullormut 50.000 koruunit annaassassallutigit, Finn Fabricius oqarpoq.

Kangerlussuup Hoteliani pisortaq Bauer Johansen oqarpoq hotelimi suliassaqarpianngitsoq, silaannakkullu angalasoqannginnerani isertitsiniarnissaq ajornakusoortoq.

- 80 procentiuvoq, tamatuma missaaniissasoq qularinngilara, tassa taama annertutigisumik annaasaqassaagut. Naatsorsuininnut ilannguppara cafeteriani imerniartarfinnilu isertitsissutaasartut, Bauer Johansen oqarpoq.

Taanna oqarpoq inuit 30-t pikkorissariartut hotelimi maannakkut najugaqartut. Inillu 35 procentiinnaat inissisimaffigineqartut, nalinginnaasumik 50 procentiusaraluartoq. Ilimagaalu sulinermik mattussineq takornariaqarnerup nalaaniissimasuuppat ajornerusimassagaluartoq.

- Inissisimalluarsimanavianngikkaluarpugut. Sulisut aasaanerani amerlanerusarput, sulisullu amerlatsinnerini taama pisoqarsimagaluarpat sulisut amerlavallaartut sulisimassagaluarput, Bauer Johansen oqarpoq.

Mittarfeqarfinni pisortap, aamma Hotel Kangerlussuarmi Hotel Narsarsuarmilu pisortaanerup, ilimagaat silaannakkut angalasoqannginnera aningaasaqarnermut malunnaataassasoq.

- Nalinginnaasumik januaarip nalaani kaaviaartitatsinnik misissuisarnitsinnit maannakkut inissisimanitsinni januaarip qaammataani naatsorsuutigaarput sapaatip akunneranut 3 million koruunit kaaviiaartitassaraluagut annaassallugit, silaannakkut angallattoqannginnera pissutaalluni.

Isertitarisartakkatta 90 procentii Air Greenlandimiit ilaasuinillu pissarsiarisarpavut, taamaattumik isertitaqarnerpaaffigisaraluakkatsinni isaatitaqanngilavut. Mittarfeqarfiit pisortaat Niels Kreutzmann oqarpoq.

Air Greenland ulluni makkunani ullormut 1 million koruuninik annaasaqartarpoq. Isumaqatigiinngittoqarneranilu qaffakkiartuinnassasoq Air Greenlandimi niuernermut pisortap, Udo Glashoff-ip oqaatigaa:

- Sulinermut mattussineq qaammat ataaseq sinnerlugu sivisussuseqassappat, 37 million koruunit annaassavagut, taakkulu ukioq kingulleq sinneqartoorutitta amerlaqatigaat, Udo Glashoff oqarpoq.

Taanna aamma oqarpoq takornariaqarnerup nalaani aningaasat amerlanerusut annaaneqarsimassagaluartut:

- Aasakkut taama pisoqarsimasuuppat ullormut 2,5 million koruuninik ullormut annaasaqartarsimassagaluarpugut.