Angalaneq "The last ice area" iluatsilluarpoq
Pinngortitaq pillugu aningaasaateqarfiup Kalaallit Nunaata avannaata kitaani angalaneq ilisimasanik nutaanik aallerfiunissaa neriuutigalugu angalatitsivoq. Angalanermilu sumiiffimmi uumasut aalisakkallu pillugit qaninut misissuinermi, aalisartut piniartullu attaveqarfigilluarnerisigut paasisassarsiorneq iluatsilluarpoq.
- Piniartut amerlasuut suli unaaq qajarlu atorlugit piniartartut naapippagut. Taakkulu ilaatigut nutaaliasunik atortunik atortoqarlutik piniarnissaq tusarusunnagulu oqaluusererusunngilaat. Arfanniartarnerminnilu siuaasamik piniariaasaat suli atugaraat, piniariaatsillu atorneqartut ukiuni honnurujulikkaani atorneqarsimapput, WWF-mi issittoq pillugu suliaqartartoq Mette Frost oqaluttuarpoq.
Nunaqarfinni Upernaviup avannaatungaani maanna aalisarneq ingerlalluarpoq. Sumiiffimmilu qalerallit angisoorujussuupput. Tamatumunngalu tunngaviuvoq sumiiffimmi siornatigut aalisartoqarujussuartannginnera. Taamaalillunilu aalisakkat sumiiffimmi pineqartumi lliartupiloorsimapput.
-Tasiusamiinnitsinni Savissivimmiinitsinnilu piniartunik aalisartunillu sunnertisimalluinnarpugut. Sumiiffinni malunnartumik nannunik piniagaqarnerat takuneqarsinnaavoq. Sumimi tamaani nannut amii takussaapput, sumiiffinnilu ilitsoqqussanik ingerlatsilluartoqarpoq.Nunaqarfimmiinitsinnilu nunaqarfik inuisappoq, inuimmi amerlanersaat piniariarsimapput. Sumiiffimmi KNAPK-mut sinniisuutitaq naapillugu oqaloqatigaarput, taannalu sumiiffiup eqqaani piniagassaqarluarneranut iluarisimaarinnippoq, Mette Frost oqarpoq.
Ilisimasassarsiornermi angalanermi misigisat nuannerluinnartut ilagaat Dundasip qaqqaanut tikinneq. Qaqqaq ilisimassarsiortunik qaqineqarsimavoq, Thuletoqqamullu 1953-mi inuerutinneqarsimasumut isikkivik tassanngaanniit takuneqarsinnaavoq.
-Illoqarfik inuerutinneqarnermi kingorna suli isikkumisulli isikkoqarpoq. Oqaluffik, pinnguartarfik, aap allaallumi Peter Freuchensip illorisimasaa qimanneqarnermisulli suli isikkoqarpoq. Maanna sakkutooqarfimmi sulisut qaqutigooraluartumik sumiiffik saneqquttarpaat, tamaaninnerlu ilisimasassarsiornermi angalanitsinni misigisat annersaraat, Mette Frost oqaluttuarpoq.
Ilisimasassarsiorluni angalaneq Qaanaamut killeqarpoq. Tamannalu pilersaarutaanngikkaluarpoq. Angalanermi ingerlateqqillugu Ullersuaq angallavigineqartussaagaluarpoq. Angalanerullu Qaanaamut killeqalernera angallatip geariata puuanik ajoquteqalerneranik tunngaveqarpoq.
-Angalanitsinni angallatip geariata puua ajoquteqalepoq, angalanerlu Canadamut ikaarluni nageqqittussaammat tamanna ajornartorsiutinngorpoq. Qujanartumillu illoqarfiup maskinmesteria elværkemi sulisoq ikiorsiullugu angallammi ajoqut iluarsiniarneqarpoq. Iluarsartuussinerlu iluatsillugu illoqarfimmi inunnik oqaloqateqarnissatsinnut periarfissaqarluarpugut. Sumiiffimmilu piniagassanik piniagassiisarneq naammagineqanngilaq. Piniagassakinnerlu peqqutaalluni sumiiffimmi ilitsoqqussat malillugit pinialuttarneq atorneqanngilaq, Mette Frost oqaluttuarpoq.
"The last ice area"-mi angalaneq ilisimatuunut angalaqataasunut nutaarluinnarmik aamma paasissutissiivoq. Paasineqarpormi sumiiffimmi taratsumik marskeqarfeqartoq.
- Maannamut ilisimasat malillugit sumiiffik avannarpasinnerpaaq taratsunik marskeqarfiusoq Ilulissat eqqaaniippoq. Upernavimmili piniartut malillugut taratsunik marskeqarfiusoq Upernaviup mittarfiata ungasinngisaanniinnerarneqarpoq. Kingusinnerusukkullumi ph.d-nngorniarluni ilinniartoq Upernaviup avannaatungaani taratsumik marskeusinnaasumik nassaarpoq.Angalanitsinnilumi taamaalilluta taratsumik marskeqarfeqarnera, paasisallu sikumut aalisakkanut uumasunullu tunngasut misigisaqarfigilluarlugit paasisanik aallerfigivagut, Mette Frost naggasiivoq.
