Martha Lund Olsen: Meeqqat aperisigit angajoqqaavi sumiinnersut
Nuummi cafep eqqaani meeqqat kaattut allaatigineqarnerata Facebookikkut saqqumilaareernerata kingorna Isumaginnittoqarfimmit pigaartup oqarasuaataa ukkatarineqarpoq. Pisup nalaani oqarasuaat ajutooqqasoqarneratigut qaminngasimavoq politiillu pisoq susassaqarfiginnginnamikku aamma ikiuussinnaanatik.
Isumaginnittoqarfimmi pigaartunut attaveqarfissat:
• Qaanaaq: 49 93 59
• Upernavik: 59 02 08
• Uummannaq: 54 95 22
• Qeqertarsuaq: 54 13 94
• Ilulissat: 53 09 17
• Qasigiannguit: 54 04 30
• Kangaatsiaq: 58 68 97
• Aasiaat: 53 61 32
• Sisimiut: 53 01 97
• Maniitsoq: 48 72 00
• Nuuk: 55 57 31
• Paamiut: 53 22 98
• Qaqortoq: 49 34 35
• Narsaq: 49 72 03
• Nanortalik: 53 75 41
• Tasiilaq: 59 82 20
• Ittoqqortoormiit: 59 91 01
Najoqqutarisaq: Naalakkersuisut
- Meeraq naapitaq oqaluullugu angajoqqaavi sumiinnersut paasiniarlugu, imaassinnaavoq angajoqqaavi uaninnguami, eqqaralaannguaniittut, taava soorunami immaqa angajoqqaat takkunnissaat utaqqilaarlugit kisianni soorunami meeqqap angajoqqaani attavigisinnaanngikkunigit angajoqqaani sumiittut naluguniuk, festerpata soorunami taava socialvagtip attaviginissaa pitsaasuuvoq, Kommuneqarfik Sermersuumi meeqqanut ilaqutariinnillu immikkoortortaqarfimmi pisortaq, Martha Lund Olsen taama oqarpoq.
AAMMA ATUARUK Evap meeqqat kaattut ikiortariaqarai
Taama pisoqarnerani kikkut iliuuseqartussaanersut nittartakkatigut attaveqaqatigiittarfikkut apeqqutigineqartoq oqallisigineqarpoq, meeqqalli ukiukitsut pineqartillugit pinerluuteqanngippata tamanna politiit suliassarinngilaat.
- Meeqqap atugarissaarnera ernumagigaanni tunngaviusumik isumaginnittoqarfimmit pigaartoq attavigineqassaaq angerlarsimaffimmilu nakuusertoqarnerani politiit nalinginnaasumik attavigineqartarput.
Martha Lund Olsenip suleqatini angerlarsimaffinnut navianartoqarsinnaasunut isersinnaanngitsut erseqqissaatigaa.
AAMMA ATUARUK Meeqqat Illersuisuata Kommuneqarfik Sermersuumi ajornartorsiutaasut ilisarai
Isumaginnittoqarfimmit pigaartoq attavigineqaraangami aallaqqaammut angajoqqaat pissarsiariniartarpai. Tamanna iluatsinngikkaangat meeraq utaqqiisaasumik ilaqutarsianut inissinneqarsinnaasarpoq.
Tamatuma kingorna suliaq malitseqartinneqassanersoq aalajangiiffigineqartartoq, Martha Lund Olsen nassuiaavoq.
Nalunaarfissaq kommunimut tamarmut atuuppoq. Mailikkut ulloq unnuarlu allattoqarsinnaavoq, taanna ulluinnarni akunnerit 24-nngortinnagit misissorneqartarpoq. Ammasarnerata kingorna pinasuartumik nalaataqarnermi isumaginnittoqarfimmit pigaartoq attavigineqassaaq. Illoqarfinni tamani oqarasuaatit normui assigiinngitsuupput.
Meeqqat inuusuttullu atugarliortut nalunaarutiginissaat tamat pisussaaffigaat kissaatigigaannilu tamanna isertortumik nalunaarutigineqarsinnaalluni.
Qulequtaa nal. 16.07 allanngortinneqarpoq.
