Angajoqqaat qitornaminnik annersaaqqusaanngillat
- 2013-imi meeqqanik annersaasoqartarneranik akuersaartoqarsinnaanera quianaannartutut isigaara atorunnaarsinneqartariaqarsoralugulu, Chemnitz Larsen oqarpoq.
Angajoqqaat perorsaanerminnut atatillugu meeqqaminnik naveersinerminni annersaasinnaatitaanerat inatsimmi allaqqanngilaq, atugaanerali siornatigut nalinginnaasuusimavoq. Angajoqqaat qitornamik timikkut tarnikkullu annersartinnginnissaannut illersuinissaat 1993-imi namminersorsinnaanermik inatsimmi naqissuserneqarpoq, angajoqqaalli qitornaminnik timikkut annersaannginnissaannik inatsimmi allassimasoqanngilaq. Tamannarpiarlu inatsimmi nutaami iluarsiniarneqarpoq. Aaja Chemnitz Larsenilli inatsisip siammasinnerunissaa kissaatigigaluarpaa.
- Meeqqat tarnikkut annersarneqartarnerat sammineqaqqunaraluarpoq, danskit inatsisiliornerannit annertunerusumik iliortoqarluni, tarnikkullu annersaasarnerup akuersaarneqannginnera inatsimmut ilanngullugu.
Ilaqutariinnermut Inatsisinillu atuutitsinermut Naalakkersuisoqarfiup nalunaarutigaa meeqqanik timikkut annersaasarneq pinerluttulerinermut inatsimmik uniuoqqutitsinertut ullumikkut isigineqartoq.
Danmarkimi angajoqqaatut akisussaaffiit pillugit inatsit 1997-imi atuutilersinneqarpoq, taannaavorlu peqqussusiornikkut Nunatsinnut aamma atuuttussanngortinniarneqartoq. Peqatigitillugu anguteqatinoortut arnaqatinoortullu oqaluffimmi katissinnaanissaat inatsisikkut aamma periarfissanngortinneqassaaq. Siunnersuut tusarniaassutigineqaqqaassaaq, kingorna Folketingimi suliarineqarluni Inartsisatullu upernaakkut ataatsimiinneranni aamma suliarineqassalluni.