Angajoqqaat akisussaassuseqarnerunissaat meeqqat ujartorpaat

Meeqqat 100-jut NAKUUSA-p paasiitsiniaalluni filmeeraliaani arfineq marluusuni peqataassapput. Ilitsersuisoq Otto Rosing-ip paasisitsiniaanermi filmiliaaqqani ilitsersuisuussaaq, immiussinerillu Nuummi illoqarfiip ilaani Qaqortumi ingerlanneqassapput. Filmiliaaqqat NAKUUSA-p paasitsitsiniaanera ’Suli anaanamik! Suli ataatamik!’ qulequtaqartoq aallaavigalugu ingerlanneqarpoq.

Filmeeraliat atorlugit paasisitsiniaaneq novembarimi aallartissaaq martsillu tungaanut ingerlanneqassalluni. Paasisitsiaanerup siunertaraa angajoqqaat meeqqaminnut akisussaanerat pillugu oqallitsitsinissaq, eqqarsalersitsinissaq, taavalu ilitsersuinissaq.  

- Meeqqat paasisitsiniaalluni filmiliarineqartussani peqataasussat ilaatigut atuarfeqarfiit, NUIF-ilu aqqutigalugit pissarsiarivagut, taama suliniummut aqutsisoq Klaus Møller oqarpoq.

Paasisitsiniaalluni filmiliaaqqani arfineq marluusuni ilitsersuisuusussap Otto Rosingip aamma kalaallit filmiliaat ’Nuummioq’ ilitsersuisuuffiginikuuaa. Paasisitsiniaanermi assit sarsuatitaliat immiunneqarnerat arfininngornermi septembarip 29-ani ingerlanneqassaaq. Immiussat KNR-TV-mi inuttaasunut paasissutissatut takutinneqarumaarput. Filmiliat naatsut amerlanerpaartaat minutsit marluk missaannik takissuseqassapput, paasisitsiniaanerlu martsip tungaanut ingerlanneqassalluni.  

- Paasisitsiniaanerput tunngavippiaatigut meeqqanit angajoqqaanut asanninnermik angisuumik nipituumillu nalunaarnerivaat, tamatumani meeqqat oqarlutik ’asavassi – suli aamma perusuinnarpassi’. Paasisitsiniaaneq aqqutigalugu meeqqat oqariartuutaat nunamut tamarmut siammarniarparputt tamatumalu kingorna angajoqqaat akisussaaffeqarnerannut tunngasumik oqallinnermut inuiaqatigiit tamarmik peqataanissaat neriuutigalugu, taama UNICEF Danmarkimi NAKUUSA-mut suliniummut aqutsisoq Arnavaraq Jørgensen oqarpoq.

Ilulissani 2011-mi meeqqat ataatsimeersuartinneqarmata meeqqat nammineerlutik saqqummiuppaat suna pingaartillugu alaatsinaanneqassanersoq.  

- Taakkualu ilaatigut aalajangerput, toqqissisimanartumik peroriartornissamut meeqqallu inuusuttuaqqallu pitsaasumik inuuneqalernissaannut sapinngisamik pitsaanerpamik atugassaqartitsiumalluni angajoqqaat akisussaaffeqarnerat sammineqassasoq, taama NAKUUSA tusagassiutitigut allagaqarnerminni allappoq.

Filmiliaaqqat saniatigut atuagaq akeqanngitsumik nunatsinni angajoqqaanut tunniussuunneqartussaq ima qulequtaqartoq ’Asannittumik’ saqqummersinneqassaaq. Atuagaq taanna meeqqat angajoqqaamminut allagaannik imaqartoq decembarimi saqqummissaaq. Inuit piumasut Pisiffik Pilersuisorlu aqqutsigalugu pisiniarfinni pisinnaassavaat.

Nunaqarfinni mikinerusuni pisiniarfinni atuagaq pineqarsinnaanngippat angajoqqaat periarfissaqarput NAKUUSA attaveqarfigalugu atuakkap piniarnissaanut. Atuagaq akeqanngitsumik tunniussuunneqartussaq  meeqqat pisinnaatitaaffiinik suliniaqatigiiffik MIO suleqatigalugu suliaavoq.