Angajoqqaarsiat minnerpaamik 25-leereersimasalissapput
Angajoqqaarsiat suliassamik naammassinnissinnaanngitsut amerlavallaat takussaasarput. Tamanna unittariaqartoq Demokraatineersoq Astrid Fleischer Rex isumaqarpoq. Taassuma siunnersuutigaa angajoqqaarsianngortussat ilaquariinnilluunniit oqilisaasussat minnerpaamik 25-ileereersimasalissasut ullumikkut 18-ileereersimasuunissaq piumasaqaataasoq allanngorlugu.
Astrid Fleischer Rex-ip ilaatigut malikkusuppaat nunarsuaq tamakkerlugu arnat akornanni pisoq. Tassalu arnat amerlanerujartortut ilinniagaqaqqaarlutik meeqqiortalernerat taamalu ukioqqortusilaareerlutik meerartaartalerlutik.
- Taamaattoqarnera angajoqqaarsianngorsinnaanermi aamma ilaqutariinnik oqilisaasunngorsinnaanermi atuuttariaqarpoq, Astrid Fleischer Rex siunnersuummini ilaatigut taamma tunngavilersuivoq.
Astrid Fleischer Rex-ip siunnersuutaa Naalakkersuisunit ilalerneqarpoq. Tamanna Naalakkersuisut siunnersuummut akissutaanni atuarneqarsinnaavoq.
- Meeqqat paarinerlugaasimasut immikkut paaqqutarineqartariaqarput immikkullu ittunik pisariaqartitsisarlutik, Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoq Mimi Karlsen akissummini allappoq.
- Pingaaruteqarpoq angajoqqaarsiat nukissaqarnissaat meeqqamik taamaattumik paarisaqarsinnaassagunik. Toqqissisimanermik aalajaatsuunermillu meeqqamut pilersitsissagaanni inerissimasuusariaqarpoq akisussaassuseqarluni taamaammallu ukiunik killiliisoqarnissaa siunertamut naleqquttuussalluni, Mimi Karlsen oqarpoq.
Taamaammat Naalakkersuiasut tapersersorpaat angajoqqaarsianngortut ilaqutariinnilluunniit oqilisaassisut minnerpaamik 25-ileereersimasalissasut.
Siunnersuut ilaqutariinnermut ataatsimiititaliami suliarineqaqqaassaaq. Siunnersuut siullermeerlugu Inatsisartuni suliarineqassaaq pingasunngorpat oktobarip 19-at.