Ane Hansen: Qeqertarsuup Tunuani aappaagu qaleralittassat ikilissapput
Ane Hansenip aamma aalisartut qanimut suleqatiginissai pingaartippaa.
- Ilulissani aalisartut piniartullu peqatigiiffiata siulittaasuata Ove Rosbachip immikkut iliuuseqartariaqarneq isumaqatigigaa tusarakku nuannaarutigisorujussuuara. Taamaattumik
naatsorsuutigineqassaaq, tamanna suleqatigiilluta aaqqinniarsarissagipput, aamma qaleralinniarnerrmut tunngasunik iliuusissanik assigiinngitsunik eqqartueqatigiinnikkiartorlunga aggustimi Ilulissiassuunga, Uummannaq Upernavilu ilanngullugit.
Tassa aappaagu qaleralittassat ikilineqassasut maannangaaq oqaatigiereersinnaavat?
- Taanna avaqqunneaqrsinnaanngilaq. Aamma qaleralinniarnermi akuersissutaatillit ikilineqarnissaat sulisussutigissalugu avaqqunneqarsinnaagunanngilaq, Taannalu eqqarsaatigalugu utoqqalisut aalisarunnaarnissamut kikaarsaarnssaat ataqqinarnerusumik siullertut suliniutigineqarsinnaavoq.
Tamatumani ilaatigut eqaarsaatigaa, aalisartut tunuarniartut akiitsullit akiitsuminnik ilanngaaffigineqarsinnaanissaat.
Qaleralittassat ikilerinerisigut nunami suliffiit aamma ikilissapput. Tassunga atatillugu Naalakkersuisooqatigiinnissamut isumaqatigiissummeereersoq, tassalu alisartut piniartullu nerisassanik Nunatsinni pilersuinerulernissaannut tunngasoq innersuussutigaa.
- Piviusungortinnissaa pilersaarusiornermik nassataqartussaammat, pineqartut peqatigalugit pilersaarusiussaagut. Nunaqarfinni tunitsiviit matoqattaartuaannartut sumiiffinnilu ataasiakkaani tunisassiorfiit allatut allattut atuutilernerisigut tamanna anguniarneqarumaarpoq, ilaatigut niuernermik suliaqartut suleqatiginerisigut. Tassa inuussutissarsiornernut allanut ikaarsaarnissaannut ilinniartitseqqinnerit allatullu inerisaanerit aallunneqassapput, Ane Hansen oqarpoq.
Aalisarneq pillugu siunnersuisooqatigiit oktoberimi novembarimiluunniit inassuteqareerpata, aalisasagartassat Naalakkersuisut aalajangiiffigissavaat.
Qaasuitsup Kommuniani immani inuussutissarsiortut isumasioqatigisinneqarnisaat piareersarneqaleruttorpoq, tassumalu kingornatigut qaleralinniarunnartut qanoq iliorfigineqassanersut isummerfigineqassasoq, borgmester Jess Svane oqarpoq.
