Ane Hansen: Niuertarfissuit aalajangiisuupput

Piniarnermut Aalisarnermullu Naalakkersuisoq Ane Hansen taama Inatsisartunut ilaasortap Aleqa Hammondip paragraf 36 naapertorlugu apeqquteqaataanut akissuteqarpoq.

Aalisakkat Kalaallit Nunaannit avammut tunissassiarineqartut MSC-mik nalunaaqutserneqarsimanngitsut nunanit sorlernit pisiariumaneqannginnersut, Aleqa Hammondip apeqqutigaa.

Nunat aalajangersimasut aalisakkanik pisiumanatik nalunaarsimanngillat, taamaattorli suliffeqarfiit aalisakkanillu pisisartut ataasiakkaat namminneq aalajangertarpaat, aalisakkat raajallu nungusaataanngitsumik aalisarneqartut kisiisa pisiarissanerlugit.

Nunat imaluunnit suliffeqarfiit amerlasuut aalisakkanik MSC-mik nalunaarsorneqartunik pisiumanerunerunersut ilisimaneqanngilaq.

Kalaallit Nunaanniit aalisakkanik pisiumajunnaarnissamik aalajangiineq nunap suliassaqarfiani pineq ajorpoq suliffeqarfiilli eqqussuisuusut aalajangiisartut Ane Hansen akissuteqarluni taama oqarpoq.

Kalaallit Nunaannit aalisakkanik pisisartut, assersuutigalugu Tuluit Nunaanni Tysklandimilu niuertarfissuarnut amerlasuunik tunisaqartarput.

Niuertarfissuit ilaatigut Tuluit Nunaanni niuerfissuit ilaasa maanna piumasarilerpaat aalisakkat qaleruallillu MSC-mik ilisarnaaserneqarsimassasut. Tuluit Nunaanni niuertarfissuit annerpaat ilaat tassaavoq Marks & Spencer, taannalu Nunatsinnit raajanik pisisarpoq.

Tunisassiat imaaneersut niuertarfissuup tuniniartagaasa piujuartitsinissamik tunngaveqarluni aalisarneqarsimanissaasa qularnaarneqarnissaat siunertaralugu Marks & Spencer maanna World Wildlife Foundationimik (WWF) suleqateqalerpoq. WWF kattuffiuvoq nerisassaarniarfissuaq Unilever peqatigalugu ukiut 15-it matuma siornali MSC-mik aallartitsisuusoq, Aalisarnermut Piniarnermullu Naalakkersuisoq Ane Hansen Aleqa Hammondip apeqquteqaataanut akissuteqarluni taama oqarpoq.