Ane Hansen Kommune Qeqertalimmi borgmesteritut atuuteqqissinnaasoq
Naalakkersuisut nutaat Inuit Ataqatigiit siulittaasuannit, Múte B. Egedemit ullumi saqqummiunneqarput.
Tamanna Nuummi kulturikkut illorsuarmi nalliuttorsiornermi pivoq.
Taassuma Peter Olsen ilinniartitaanermut, kulturimut, timersornermut ilageeqarnermullu naalakkersuisutut ilaatigut saqqummiuppaa.
Peter Olsen Kommune Qeqertalimmi kommunimut qinersinermi taaguunneqarpaavoq. Peter Olsenimi parteeqatimit, maannamut borgmesteriusumit, Ane Hansenimit 387-init taaguunneqartumit taaguunneqarnerulluni 442-nit taaguunneqarpoq.
Partiilli kommunimi taaguunneqarnerpaasua akunnattooruteqarpoq. Taannami Inatsisartunut aamma qinigaavoq.
Taamaammat Kommune Qeqertalimmi borgmesterinngussanerluni imaluunniit Naalakkersuisutut atuuffeqalissanerluni aalajangertussaavaa. Taassumalu Naalakkersuisut toqqarpai.
AAMMA ATUARUK Borgmesteri naalakkersuisorluunniit? - Peter Olsen nalornisoq
Taamaammat Ane Hansen Kommune Qeqertalimmi borgmesteritut atuuteqqiinnarsinnaavoq.
IA-p gruppiani siulittaasoq, Frantz Lundblad tusagassiuutinut nalunaarummi allappoq.
- Kommune Qeqertalimmi borgmesterinngortussatut Ane Hansen isumaqatigiissutigaarput, Ane Hansenip kommunimi aqutseriaaseq nutaarluinnaq kommunalbestyrelse peqatigalugu eqquppaa inaarsarnissaanullu pitsaasumik tapersersorneqarluni sulilluarumaartoq qularutiginngilarput, Frantz Lundblad oqarpoq.
Ane Hansenillumi borgmesteriuginnarnissani aamma nuannaarutigaa, borgmesteriuinnarnissanilu piffissami kingullermi ilisimareersimavaa.
- Qinersinerup kingorna, oqaloqatigiinnerit assigiinngitsut pilersaarusiornigut ukiuni tulliuttuni anguniagassat pillugit, tassanili paasinarsereerpoq borgmesterinngoqqittussanngortunga. Naalakkersuisunngortitsiniarlunili isumaqatigiinniarnerit avammut saqqummiunneqarnissaat utaqqimaarsimavagut, Ane Hansen oqarpoq.
Qinigaanerpaanngikkaluarlutit borgmesteritut ingerlaqqilernerit arlaannik ilinni eqqarsalersitsiva?
- Soorunami. Kisianni maluginiaqqussavara kingullermik qinersinerminngaanniit qinersisikka amerleriarsimagamik, taavalu siammasillutik. Tassa kommunitsinni illoqarfiit pingasut tamarmik siuariarfiullutik, taamaallaat Aasiaat kisimi nikittoorfiulluni, taamaammat qularutiginngilara tapersersuineq tapersersueqatigiinnerlu annertuujussasoq, Ane Hansen oqarpoq.
Peter Olsenip naalakkersuisunngornissaminut akuersinissaa illit neriuutigisimaviuk?
- Oqaloqatigiartormanga oqaatigaa isummani paasut, taava oqarfigisimavara: uummatit illit qanoq oqarpa? Illit nammineq qanoq misigivit? Taanna aalajangernissannut aallaavigissavat. Taamaaliorsimavorlu, Ane Hansen oqarpoq.
