Ane Hansen: eqqarsaatigilluakkanik aalajangiisoqartariaqarpoq

Arfanniarneq pillugu ataatsimiititaliarsuarmut, IWC-imut, Nunatsinniit ilaasortat ataatsimiititaliarsuup immikkut ittumik USA-mi Floridami ataatsimiinnerani peqataapput. Kalaallit Nunaata qipoqqarnik qulinik pisassinneqarnissaminik kissaataa pingajussaa oqaluuserineqassaaq, Kitaanilu tikaagullinnik 178-inik 2010-miit 2012-ip tungaanut pisassinneqarneq aamma oqaluuserineqassalluni.
marsip 04-at 2010 17:47

Kalaallit Nunaat 1986-imili suli qipoqqartassinneqaqqinngilaq. Qipoqqartassinneqarnissamillu qinnuteqaat IWC-imit itigartinneqartuaannarmat, IWC-imut ilaasortaajunnaarnissaq Naalakkersuisut eqqarsaatigilerpaat.

IWC-ip itigartitsiuaannarnerata ersiutigaa, uumasunik illersuiniaqatigiit sunniuteqarpallaalersut, aalisarnermut piniarnermullu Naalakkersuisoq, Ane Hansen, januaarip ulluisa arfineq-pingajuanni oqarpoq: - Kalaallit Nunaata kissaatai akuerineqanngiinnarpata, ataatsimiititaliarsuarmi siunissami ilaasortaasariaqanngilavut, Ane Hansen KNR-imut taamani oqarpoq.

Arfanniarneq pillugu ataasimiititaliarsuup iluani ilisimatusarnermut ataatsimiititaliaq 2008-mi 2009-milu naliliipput, qipoqqaat qulit pisassiissutigineqaraluarpata qipoqqaat amerlassusaannut ajoqutaanavianngitsoq. Taamalu naliliineq Floridami ullumikkut ataatsimiinnermi pingaartutut eqqaaniarpaa:

- Oqalugiarninni erseqqissaatiginiarpara, Ilisimatusarnermut Ataatsimiititaliap 2008-mili siunnersuutigimmagu qipoqqarnut ikilisaataanngitsumik qipoqqartoqarsinnaasoq. IWC ataatsimiititaliatut annaanneqassappat, aalajangiinerit eqqarsaatigilluakkat piaartumik pisariaqarput, Ane Hansen tusagassiuutinut allappoq.

IWC-imiit maannamut itigartitsissutinut pissutaapput Kalaallit Nunaata pisassiissutissatut siunnersuutai nunat EU-mut ilaasortat amerlanersaasa akueriumanngimmatigik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq