Ane Hansen: Ataatsimiititaliarsuup inassutai inatsisissami ilaanngillat
- Aalisarnermut inatsisissatut siunnersuut annertuunik tunngaviusunillu pingaaruteqartunik amigaateqarmat, aalisarnermi soqutigisaqaqatigiiffiit qisuariaataat allaavigalugu eqqarsaatigilluareerlugu aalajangiussimavara, inatsisissatut siunnersuut taamatut isikkoqartillugu saqqummiunniarnagu. Naalakkersuisuniit aamma pingaartipparput, Aalisarneq pillugu ataatsimiititaliarsuup inassutaasa qimerlooqqissaarnissai, taakkualu ilanngunnissai siunertaralugit sulisitsinissaq , Ane Hansen oqarpoq.
Taamaammat aalisarneq pillugu inatsimmut, maanna atuuttumut, allannguutissatut siunnersuutinik marlunnik Naalakkersuisoq Inatsisartut ukiaq manna ataatsimiinneranni saqqummiussiniarpoq.
Tassalu Naalakkersuisut pisanik nalunaarutinik sukkasuumik allaffissornermi suliarinnissinnaalissapput, nunamullu tulaassanik nakkutilliinissamut periarfissaqalissallutik.
- Annertunerusumik qulaajaasoqassasoq, ataatsimiititaliarsuarmiit inassutigineqarpoq. Taamaattumik suleqatigiissitaliat sisamat pilersinniarpagut. Taakkunanngalu marluk pilersinneqareerput, marlulli allat naalakkersuisuniit siunertarisagut aamma aallaavigalugit piffissami qaninnerpaami aallartissavagut, Aalisarnermut naalakkersuisoq oqarpoq.
Suleqatigiissitat siulliit misissussavaat, pisassiissutinik aappaagumut nuussisinnaanermik periarfissaasoq qanoq isummerfigineqassanersoq.
Suleqatigiit allat nalilerniassavaat, aalisartut ataasiakkaat pisassaminnik tuniniaasinnaanerat allanngortinneqaassanersoq.
Suleqatigiit pingajuata misissussavaat, avataasiorluni aalisarnerup sinerisallu qanittuani aalisarnerup ataatsimoortinneqalerneranni, aalisartunut ataasiakkaanut pisasiissuutigineqartut annertussusissaat.
Kiisalu suleqatigiissitat aamma allat misissussavaat, aalisartitsisut ingerlatsinerat qanoq oqilisarneqarsinnaanersoq.
Naalakkersuisut nutaat taakkua saniatigut aamma inuusuttut aalisarnermut ajornannginnerusumik qanoq akuulersinneqarsinaanersut misissortikkusuppaat.
Aalisarnermut naalakkersuisup Ane Hansenip naatsorsuutigaa, aalisarneq pillugu inatsisissami allannguutissat siulliit upernaaru saqqummiunneqarsinnaasut. Kisianni Aalisarneq pillugu inatsit nutaaq tamakkiisoq 2012-imi aatsaat inaarneqarsinnaalluartoq ilimasaarutigaa.