Ane Hansen: Amminik mattussineq aalisarnermut sunniuteqarnerlussaaq

NAQQITAQ: EU-p puisit amiinik eqqusseqqusiunnaarnera Nunatsinnuinnaanngitsoq, aammali nunarsuarmi aalisarnermut sunniuteqarnerlussaaq, taama isumaqarpoq aalisarnermut naalakkersuisoq Ane Hansen, Inuit Ataqatigiit, aalisarnermut ministerit nunanit tamalaaneersut Spaniami ataatsimeersuarneranni peqataasoq.
Allattoq Jens Thorin
septembarip 14-at 2009 16:19

- Nunatsinni maannakkut puiserpassuaqarpoq. Puisit 8 millionit pallillugit amerlassuseqartut oqaatigineqartarpoq, taakku aalisakkanik 8 million tonsinik ullormuinnaq nerisarput. Puisit amerliartulissappata nunarsuarmiunut qanoq sunniuteqassanersoq ataatsimeersuarnermi nassuiassavara, Ane Hansen oqarpoq.

Aalisarnermut ministerit nunani tamalaaneersut tallimassaannik naapinnerminni piujartitsinissaq tunngavigalugu aalisarneq oqaluuserissavaat.

Ane Hansenip neriuutigaa, puisit amiinik EU-mut eqqusseqqusiunnaarnermik aalajangernerup, suli inaarutaasumik ilusilerneqanngitsup, allanngortinniarnissaanut aalisanermut ministereqatini ikiortigissallugit.

- EU tassaasussaagaluarpoq nunat niueqatigiinnikkut pitsaasumik siuarsarfiat,taamaattumik paasitinniartariaqarparput aalajangiineq nunatta niuerneranut qanoq kingunerluuteqariartortoq, Aalisarnermut naalakkersuisoq oqarpoq.

- Puisinik piniarnerup annikinnerulerneratigut imartagut aalisagakinnerulissapput, nunatsinni aalisartut ullumikkut eqqugaanerannik kinguneqartumik. Aammali siunissami ungasinnerusumi nunarsuarmioqatigiit aalisagartugassakinnerulissapput, Ane Hansen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq