Andreas Uldumip Naalakkersuisut utaqqimaarniarpai
Taassuma uani erseqqissaatigivaa Aalisarnermut Naalakkersuisup Ane Hansenip akit minnerpaaffilerneqarnissaanut tunngavissaqannginneranik oqariartormat Demokraatit sinnerlugit Aalisarnermut tunngasunik oqaaseqartartuattut tapersiigami, Aalisarnermut Piniarnermut Nunalerinermullu Ataatsimiititaliami siulittaasutut oqaaseqarani.
Nuummi aalisartut tunisamik akilutsinneqarneri pillugit naammaginnikkunnaarlutik ingerlaaqatigiipput, taakkualu Inatsisartut saavanni Aalisarnermut Ataatsimiititaliap siulittaasuannit naapinneqaratillu tusarneqanngillat, tassa Andreas Uldum savaatillit naapinneranni najuukkiartorsimagami saqqummersinnaasimanngilaq, taamaattoq ima oqariartuuteqarfigisimassagaluarpai.
- Naalakkersuisut suliaq tiguaat, taakkualu suliamik inerniliinerat utaqqimaaqqaarniarpara isummersunnginnanni, Andreas Uldum, Aalisarnermut, Piniarnermut Nunalerinermullu ataatsimiititaliami siulittaasoq oqarpoq. taassumap pissusissamisoorsorinngilaa Ataatsimiititaliami ilaasortat tusagassiuutitigut ataatsimiigiaqqusinissamik piumasaqarnerat ataatsimiititaliamullu toqqaannartumik piumasaqartoqanngitsoq. Taamaattoq Aalisarnermut Piniarnermut Nunalerinermullu Ataatsimiititaliami siulittaasutut ataatsimiigiaqqusisinnaavoq, taama iliorniarnerpa?
- Ataatsimiititaliami ilaasortat ataatsimiittoqarnissaanut piumasaqarpata taava ataatsimiigiaqqusissuunga, taamaanngippat Naalakkersuisut suliamut inerniliinissaat utaqqimaaqqaassavara, Andreas Uldum oqarpoq.
