Anders Brøns Polar Seafoodimi piginneqataasoq toqukkut qimaguttoq

Nutartigaq nal.16.15.

Anders Brønsip sisamanngornermi unnukkut Polar Seafoodimi ukiorpassuani suleqatini piginneqatigisanilu Jens Salling Alborgimi nereqatigisimavaa, kingornalu imminnut avissaarsimallutik, kingornali susoqarsimanersoq ilisimaqqissaarneqanngitsoq, Sermitsiaq.AG allaaserisaqarpoq.  

Umiarsuup neriniartarfiup Prinses Julianep avataani Vestre Havnepromenademi, tallimanngornermi ullaap tungaani nalunaaqutaq aqqaninngunngitsoq, angummik toqungasumik nalunaarutiginnittoqartoq, aviisi Nordjysk taama allaaserisaqarpoq.

68-nik ukiulik Anders Brøns imaanit nunamut qaqinneqarpoq, ikiueqqaarniarnerullu kingorna Aalborgimi Universitetshospitalimukaanneqarpoq, kingornalu toqusutut nalunaarutigineqarluni.

Imaanut nakkarsimasoq pillugu politiit kalerrinneqarmata kingorna Anders Brønsiusoq inuttarsineqarpoq.

Pisoq pillugu pinerluttoqarsimanngitsoq, Jyllandip avannaani politiini pigaartup, Poul Badsbergip KNR-imut ilisimatitsissutigaa.  

- Imaaniittoq nassaarineqarmat nalunaaqutaaraqarsimavoq mobiileqarlunilu, taamaattumik alianartumik ajutoornerusoq isumaqarpugut, nassaarineqartullu timaa aamma misissorneqassaaq, pigaartoq KNR-imut oqarpoq.

Anders Brøns Arsummi 1949-imi inunngorpoq, inuusuttuaraallunilu aalisarneq pillugu aallussaqarsimavoq.
Polar Seafood Greenland A/S 1984-imi pilersinneqarpoq, taamaalilluni nunatsinni suliffeqarfiit annersarilerpaat ukiumullu 3 milliardit koruunit sinnerlugit kaaviiaartitaqarluni.

Polar Seafoodip siulittaasua, Henik Leth sulisunut ima nalunaaruteqarpoq:

- Aliasungaarlunga tupannikooqalungalu nalunaarutissavara, Anders Brøns tallimanngormat ulloq 7. december Aalbogrip umiarsualiviani ipilluni toqukkut qimagummat. Pisoq tupannaannanngilaq inuttullu alianartuinnaanani, aammali Polar Seafoodimut annaasaqarneruvoq annertoqisoq. Andersimi suliffeqarfiup aallartinneraniit ineriartortinnerani nutsuisuullunilu uummarissaasuuvoq. 

Polar Seafoodimi siulittaasoq taama sulisunut nalunaaruteqarpoq, Henrik Lethilu KNR-imut massakkut annerusumik oqaaseqarumanani nalunaarutigaa.