Kommunit: Eqqaavissuit ammaannartut atorunnaassavagut
Isikkivigut alutornarluinnartuupput, ilaatigulli eqqaavissuit isikkivigissumi ipput, kukunneqarlutillu ikuallalillaraangamik silaannaq mingutsittarpaat, pujualu tipigippallaartarani. Silaannarpulli mingutsinneqarpallarunnaassasoq, kommunit ataatsimoorlutik ingerlatseqatigiiffiliaanni ESANI A/S-imi pisortaq Frank Rasmussen oqarpoq.
- Eqqakkanik ikuallaaviit ima pilersaarusiorneqarput "eqqakkat amerliartorunnaarsittussanngorlugit" siunertaqarlutik, eqqakkat ullormut katersukkat taakkunani isumagineqartassapput. Ikuallaaviilli aamma naammassisaqarsinnaassusertik sinneqqalaassavaat. Tassalu ullormut eqqakkat isumagineqarnerisa saniatigut eqqaavissuarnut katersorneqarsimasut ikilisikkiartuuaarlugit nungukkiartuaartinneqassapput, Frank Rasmussen oqarpoq.
Eqqakkat sinerissami eqqaavissuarni ittut ikuallaavittaassanut poortoriarlugit Nuummi Sisimiunilu sananeqartussanut nassiussuunneqartassapput, taamaaliornikkut imminut illersorluarsinnaasumik ikuallaasoqartalissasoq ingerlatseqatigiiffittaami pisortap, Kommuneqarfik Sermersuumilu ingerlatsinermut avatangiisinullu ingerlatsisup, Frank Rasmussenip KNR-imut oqaatigaa.
Taassuma aamma oqaatigaa ikuallaaviit sananeqartussat ukiut 30-it tungaannut atorneqasinnaasungorlugit sananeqassasut.
AAMMA ATUARUK Nuummi Sisimiunilu ikuallaaviit nutaat illoqarfinni allani ikuallaaviit matussagaat
Eqqaavissuit ammaannartumiittut ukioq suna atorunnaarnissaat suli ullulerneqanngilaq, ikuallaavittaassat 2022-mi 2023-milu piareerneqarnissaat naatsorsuutaavoq.
