Anda Uldum Maliina Abelsenilu Canadamiittut
Nunatsinni ishockeyrtarfeqannginnerput pissutigalugu AWG-toqarnerani ishockeymik unamminerit Nunavummi ingerlanneqartussaapput, AWG-milu suleqatigiinnissap ingerlanneqarnissaanut assigiinngitsut isumaqatigiissutiginiarlugit Anda Uldum Maalina Abelsenilu Canadaliarsimapput. Aallartitat marluusut Iqalunni borgmesterimik John Grahamimik pissarsiffiulluartumik ataatsimeeqateqarsimapput. Taassuma aaqqissuussineq tamakkiisumik tapersersorpaa, Kalaallit Nunaatalu suleqatiginissaa borgmesterinngorlaap qilanaarivaa.
- Nuannaarutigaarput illoqarfik Iqaluit suleqatigisinnaagatsigu, taamaaliornikkullu Arctic Winter Games 2016-imi ishockeymik unamminerit ilaatinneqarsinnaapput unammiuaarnerillu iluatsilluartumik ingerlanneqarlutik. Inuiaqatigiit marluusugut ataatsimoorutissarpassuaqarpugut, attaveqarnittalu nukittorsarnissaanut aammalu misilittakkanik ilisimasanillu paarlaasseqatigiinnissamut periarfissatsialattut isigaarput. Illoqarfiup Iqaluit innuttaasuisalu unammiuaarnernik pilersaarusioqatiginissaat qilanaarivarput. Suleqataarusussuseq illoqarfiup Iqaluit takutitaa qujamasuutigaarput, Anda Uldum nassuiaavoq.
Arctic Winter Games 2016-ip ingerlanneqarnissaanut suli ungasikkaluartoq, Canadami illoqarfiup aaqqissuussinermi suleqatigineqartussap sapinngisamik siusissukkut isumaqatigiissuteqarfiginissaa pingaaruteqartupilussuuvoq. Taamaaliornikkut aaqqissuisut susoqassanersoq qanorilinnikku ingerlanneqassanersut paasiniassammatigu.
- Inuiaqatigiit marluusugut timersornerup ineriartortinneqarnissaanik, peqatigiinnissamik kiisalu issittumi unammiuaaqatigiinnerit anersaavat atorlugu kulturimik naleqartitanillu siuarsaanissamut suleqatigiittarnitsinnut assersuutissaalluarpoq. Suleqatigiittarnerput immikkuullarissoq ileqqoraarput. Nuuk Iqaluillu 2002-mi Arctic Winter Gamesimik aaqqissuisuupput. Kalaallit Nunaanni unammiuaarnerit 2016-imi ingerlanneqarnissaata iluatsilluarnissaa aamma suleqataaffigissavarput, Arctic Winter Gamesillu 2020-mi ingerlanneqarnissaaanut atatillugu suleqatigiinnerup ingerlateqqinneqarnissaa qilanaaralutigu, borgmester John Graham oqarpoq.
