Anartarfiit igittakkanik puussiartallit atorunnaarsinniaraat
Nunatsinni kuuinnartuunngitsunik anartarfippassuaqarpoq. Tamanna eqqagassat imerpalasut naammattumik kuuffeqannginneranik peqquteqarpoq. Anartarfiit igitassanik puussialertakkat taarsiullugit atugaapput. Taakkuali mingutsitseqaat. Taamaammat Naalakkersuisut allaanerusumik aaqqissutissarsiorput.
Assersuutigalugu anartarfinnik assigiinngitsunik piginnaasalinnik arlalinnik misileraapput. Misilerakkat sorliit pitsaanerunersut suli inernilerneqanngimmat, aalajangiisuusumik inerniliisoqanngilaq.
Inoqutigiit anartarfinnik igittakkanik atuisut amerlassusaat:
Avannaata Kommunia: 2.456
Kommune Qeqertalik: 1.138
Qeqqata Kommunia: 710
Kommuneqarfik Sermersooq: 501
Kommune Kujalleq: 435
Tusarfik: Naalakkersuisut.
- Misissorneqartut pingasut missaanniipput, ilaatigut ikuallaanermik aallaavillit ilaatigut plastikki atornagu qummuattarujussuit qorferujussuit atorlugit salinneqarsinnaasut taakkua aamma misilerarneqarput, avatangiisinut naalakkersuisoq, Kalistat Lund, Inatsisartut oqaluttarfiannit pingasunngornermi oqarpoq.
Sumiiffippassuarni ajornartorsiutaasoq
Taanna Inatsisartunut ilaasortat ippassaq apeqqarissaarfigaat. Demokraatineersoq Anna Wangenheim anartarfeqarneq pillugu apeqquteqartuuvoq.
Puussianik plastikkiusunik atuiunnaarnissaq naalakkersuisup pingaartippaa.
- Anartarfeqarnerup tungaatigut plastikki atornagu aaqqiissuteqarnissarput siunissami pingaaruteqartorujussuuvoq. Taanna aaqqinneqarsinnaappat, aamma sumiiffippassuarni ajornartorsiutit annertoorujussuit ukiorpassuarni ajornartorsiutaasut aaqqinneqartussaapput, tassuunakkut tamakkiisumik uagut suleqataaniarpugut, Kalistat Lund oqarpoq.
Igittakkanik puussiartalinnik anartarfeqarneq nunatsinni suli takussaaqaaq. Annermik Avannaata Kommuniani. Kisitsisit 2019-meersut naapertorlugit nuna tamakkerlugu inoqutigiit igittakkanik anartarfillit katillugit 5240-pput. Taakkunannga 2456-it Avannaata Kommunianiillutik.
Naalakkersuisut siuliisa anartarfiit igittakkat gassitortunik ikuallaasartunik taarsernerat qanoq aningaasartuutaasinnaanersoq naatsorsornikuunngilaat. Ataaserli koruunit 30.000 missaanik akeqartoq allapput.