AWG: Anaanat pingasut qitornaminnik toqqagaaqateqartut
Yukonimi illoqarfiit pingaarnersaanni Whitehorsemi Arctic Winter Gamesimi ikumatitaq ikinneqarpat Aaka Tobiassen Karlsen, Kirstine Sigurdsen aamma Paninnguaq Amossen Qvist misigissutsikkut attortisimallutik ammaanersioqataassannguatsiarput.
Arnammi taakku nukittuut eqqillit timersuutaanni Dene Gamesimi Nunarput sinnerlugu unammissapput. Tassungali ilaliullugu Paninnguaq Amossen Qvistip qitornani Petra Amossen aamma Nuka Qvist toqqagaaqatigivai taakku Arctic Sportsimi unammeqataassallutik.
Kirstine Sigurdsenip pania Niina N. Sigurdsen aamma Aaka Tobiassen Karlsenip pania Aili Tobiassen aamma Arctic Sportsimi toqqagaapput.
Oqaasertaleruminaappoq
Peqataasussanngornerminnik ilisimatinneqarput toqqagaaniulluni unammisitsineq Uummannami oktobarip naalernerani pimmat.
- Paniga toqqagaangami soorunami nuannaartorujuuvoq. Sussanerlunga uanga naluleraluarpara. Isikka immatserunik kinguninngualu illalertarlunga. Misigisaq assut immikkuullarippoq, Kirstine Sigurdsen Ikerasammeersoq oqarpoq.
Taamatuttaaq Paninnguaq Amossen Qvist Uummannameersoq qitornaminik marlunnik toqqagaaqateqarluni attortippoq. Ilimagisaareerpoq pania Petra Amossen Arctic Sportsimi toqqagaassasoq. Taava Paninnguup atia højtalerikkut taaneqarpoq kinguninngualu ernerata Nuka Qvistip atia taaneqarluni.
- Pilluarnermik qiavunga. Siornatigut toqqagaangajaannartarpunga meeqqakkali mikimmata peqataanngiinnartarlunga. Toqqarallakkamut 2016, 2018 aamma 2020-mi ilaagaluarpunga, Paninnguaq Amossen Qvist oqaluttuarpoq.
Panimminik Aili Tobiassenimik toqqagaaqateqarnerminik Aaka Tobiassen Karlsen assut aamma nuannaarutiginnippoq.
- Oqaasertaleruminaappoq. Uanga panigalu tamanna anguniagaraarput maannalu piviusunngortussanngorluni, Aaka Tobiassen Karlsen oqarpoq.
Eqqarsartaatsikkut piareersarneq
Arctic Sportsip aamma Dene Gamesip assigiissutigaat unamminerit periarnerillu unammissutsini assigiinngitsuni sekundialunnik sivisussuseqartarmata. Taamaattumik eqqarsartaatsikkut piareersimalluarnissaq pisariaqartarpoq
Anaanat eqqartorneqartut timersuumminnut piareersartarnerat aamma assigiissuteqarpoq.
- Angusassat imatut eqqarsaatigineq ajorpakka namminerli inuttut killiffiga aallaaviginerusarlugu. Ilaatigut kisimiinnialaartarpunga imminut naalaarlunga tullinnguunnissannut piareeriartortarlunga, Kirstine Sigurdsen oqarpoq.
Paninnguaq Amossen Qvist aamma imminut naalaarluni unamminissaminut piareersartarpoq.
- Immitsinnut tapersersoqatigiittorujuusarpugut aamma timersuutitsinni teknik apeqqutaasarami. Pitsanngoriaataasinnaasut pillugit ilisimateqatigiittarpugut aammalu ilisimasavut allanut ingerlatinniartarlugit, Paninnguaq Amossen Qvist oqarpoq.
Unamminernut piareersarnermi Aaka Tobiassen Karlsen aamma eqqarsartaatsikkut piareerniartarpoq.
- Periusera atoqqikkumaarpara imminullu unammillunga. Angusat unammitillunga eqqarsaatigivallaarneq ajorpakka, kisianni soorunami sapinngisara tamaat sukataarumaarpunga, Aaka Tobiassen Karlsen oqarpoq.
- Assut aamma oqaatigerusuppara timersuutinni aallartinnikuugama pania Aili pillugu. Aamma inuttaanut eqqaanikuuara Arctic Winter Gamesimut peqataanissat uattut anguniartariaqaraa. Taamaattumik peqataaqatigiinnissarput immikkuullarittussaavoq, Aaka Tobiassen Karlsen oqarpoq.
Taanna kalaallini siullersaalluni arnani inersimasuni Dene Gamesimi ujaminnattuuvoq 2024-mi bronzennakkami.
2026-mi Arctic Winter Games Yukonimi Whitehorsemi marsip arfineq pingajuannit 15-iata tungaanut pisussaavoq.
