Anaanaq Inatsisartuni akuersisoqareersoq: Neriuutissaqalerpugut
Paarnannguaq Mathiassenip paniata paasinikuunngisaannarpaa sooq atuartariaqarnerluni. Meeqqat atuarfianni naammassinissaa ukiumik ataatsimik sioqqullugu paasineqarpoq annertuumik naqinnernik ilisarinnissinnaanngitsoq.
AAMMA ATUARUK Anaanaq: Pissutsit ilungersunartorujussuartut uagutsinnut inissisimapput
Tamanna siorna pivoq.
Paarnannguaq Mathiassenimummi panimmi 16-inik ukiullip naqinninnernik ilisarinnissinnaannginneranut misissortinnissaa meeqqat atuarfianni atuarnera tamaat ajornartorsiutigisimavaa, naqinninnernut ilisarinnissinnaanngitsunut Nunatsinni misissuuteqannginnatta.
- Naqinninnernik ilisarinnissinnaanngitsunut Nunatsinni suliaqartunik aallarnissaasoqassasoq neriuuteqarfigilerpara. Qulakkeerumallugu meeqqat inuusuttullu naqinnernik ilisarinnissinnaanngitsut ikorfartorneqarnissaat. Tassa pisariaqartitaminnik tunineqarnissaat, Paarnannguaq Mathiassen oqarpoq.
Taassuma oqaluttuaraa naqinnernut ilisarinnissinnaanngitsunut tunngatillugu siunnersuutit pingasut Inatsisartuni aappassaaneerneqarmata paninilu malinnaavigisimagitik.
- Nuannaajallappugut tamatta. Aamma ilaqutariittut. Ilaqatariittut oqaloqatigiissutigaarput tamanna, oqaluttuarpoq.
Akerliunertaqanngitsumik akuerineqartut
Inatsisartummi siunnersuutit, ataatsimoortinneqalersimasut, akerliunertaqanngitsumik akuersissutigaat. Taamaalilluni naqinninnernik ilisarinnissinnaanngitsunut aamma allanniarnermikkut atuarniarnermikkullu ajornartorsiuteqartunut nuna tamakkerlugu iliuusissanik pilersaarusiortoqartussanngorpoq.
Naqinninnernik ilisarinnissinnaanngitsut amerlassusaat naluneqarpoq
- Naalakkersuisulli 2018-imi taggissimavaat Nunatsinni innuttaasuni 2.800-t aamma 5.600-t akornanni amerlassusillit naqinnernik ilisarinnissinnaanngitsut.
- Naalagaaffiit Peqatigiit Meeqqat pillugit Isumaqatigiissutaannut tunngatillugu Danmarkip 2008-mi
nalunaarusiaani tagginneqarpoq Nunatsinni innuttaasuni 1.100-t imaluunniit 2.800-t missaaniittut atuarniarnermikkut allanniarnermikkullu ajornartorsiuteqartut.
- Naqinninnernik ilisarinnissinnaanngitsunut Nunatsinni suliaqartunik aallarnissaasoqassasoq neriuuteqarfigilerpara. Qulakkeerumallugu meeqqat inuusuttullu naqinnernik ilisarinnissinnaanngitsut ikorfartorneqarnissaat. Tassa pisariaqartitaminnik tunineqarnissaat, Paarnannguaq Mathiassen, naqinnernik ilisarinnissinnaanngitsut pillugit ilisimatusarusuttut aamma ukkatarineqarnerulernissaannut neriuuteqartoq, taama oqarpoq.
- Neriuppunga naqinnernik ilisarinnissinnaanngitsuunermik ilisimatusarusuttut periarfissangissaartinneqalissasut aamma sulisussanik amigaateqartoqarnera iliuuseqarfigineqassasoq.
Naqinnernik ilisarinnissinnaanngitsut pillugit siunnersuuteqartut tassaapput Inuit Ataqatigiinnersoq Sofia Geisler. Taanna nuna tamakkerlugu iliuusissanik pilersaarusiortoqarnissaanut kissaateqarpoq. Siumumeersoq Aslak W. Jensen kalaallisut programimik ikiuutinik sanasoqarsinnaanissaanut kissaateqarpoq. Kiisalu Demokraatineersoq Nivi Olsen naqinnernik ilisarinnissinnaanngitsunut misissuummik kalaallisuumik ineriartortitsisoqarlunilu atuutilersitsisoqarnissaanik kissaateqarpoq.
Paarnannguaq Mathiassenip pania Ella Mathiassen naqinninnernik ilisarinnissinnaanngitsut efterskolianni Qallunaat Nunaanni ukioq manna aallartittussaangaluarpoq. Coronali pissutigalugu aallartinnissaa aappaagumut ilaqutariit kinguartinniarlugu aalajangersimapput.
