Anaanaq: Pissutsit ilungersunartorujussuartut uagutsinnut inissisimapput
Paarnannguaq Mathiassenip panimmi 16-inik ukiullip naqinnernik ilisarinnissinnaannginneranut naqissusiititsiniarnera paniata meeqqat atuarfianni atuarnerani ajornakusoorsimavoq.
- Taassuma tungaanut piginnaasatigut kinguarsimasutut nalilerneqartarsimavoq. Taava aamma inuttaanut paasimiunaattarsimavoq sooq atuarfiliartariaqarnerluni. Meeqqanit allanit allaanerusutut isigineqartarsimavoq. Aamma qinngasaarneqartarneri nikassarneqartarnerilu annertoorujussuusarsimallutik.
Paarnannguaq Mathiassen Ella Mathiassenimut anaanaasoq, taama oqaluttuarpoq.
Ella Mathiassenip meeqqat atuarfianni atuarnini aasaq manna naammassivaa. Kisianni annertuumik naqinnernik ilisarinnissinnaanngitsoq siorna aatsaat paasineqarpoq. Tassa ukiormi atuarfigisaani kingullermi. Tamannalu arnaata kimigiiserluni uteriisernerinnaatigut pivoq.
- Tassa uteriinnikkut MISI-mut (MISI perorsaanikkut tarnip pissusaatigut angajoqqaanut sulisunullu siunnersuinernik neqerooruteqartarpoq, aaqq.). Tassani paasinarsivoq naqinnernik ilisarinnissinnaanngitsoq annertoorujussuarmik, Paarnannguaq Mathiassen oqaluttuarpoq.
Ikiorserneqanngillat
Paarnannguaq Mathiassenilli panianut tunngatillugu tassunga killeqarallarpoq.
- Tassanngaanniit atuarfimmit aamma iluamik ikiuutissanik tunniussisoqarsinnaasimanngilaq. Naqinninnernik ilisarinnissinnaannginnera annertummat. Taavalu atortutigut kalaallisuunik assigisaanillu ilitsersorneqarnissaa killeqangaatsiarsimalluni. Naqqinnernik ilisarinnissinnaanngitsunut meeqqat atuarfianni ilinniartitsisoqannginnera ilaatigut pissutaalluni, Paarnannguaq Mathiassen oqaluttuarpoq, nangillunilu:
- Qallunaat periusaat atorlugit uanga nammineq angajoqqaatut ilinniartitsissusiorlunga aallartinnikuuvunga. Kisianni aamma kipiluttunartorujussuarmik.
Paarnannguaq Mathiassenip pania tapersersorteqarnissaminut ukioq manna akuerineqarpoq. Kommunilli akuersinerminit qaammatit marluk qaangiutiinnartut tapersersorteqarnera, assiginngitsunik pissuteqartumik ingerlalluarsimanngitsoq, aamma unitsippaa.
- Pisortaniit ikiuutinik pissarsiniarneq, soorlu tapersersorteqartitsinissaq aamma ikiuutinik allanik, soorlu iPadinik assigisaanillu, ajornartorujussuuvoq. Aporfilersorneqangaatsiartarpugut, paarlattuanilli ilitsersorneqarneq ajorluta aqqutit suut atorutsigit pitsaanerussanersoq, Paarnannguaq Mathiassen oqaluttuarpoq.
Inatsisartuni oqaluuserineqarniartoq
Inatsisartulli aalajangiisinnaasuuppata oqaluttuat taama ittut tamaannga killeqassangaluarput.
Ullumimi, marlunngornermi, Inatsisartut siunnersuutit assigiinngitsut pingasut, tamarmik naqinnernut ilisarinnissinnaannginnernut tunngasut, ataatsimut oqaluuserisassanngorlugit inissitat, oqaluuserissavaat.
Siunnersuuteqartut tassaapput Inuit Ataqatigiinnersoq Sofia Geisler. Taanna nuna tamakkerlugu iliuusissanik pilersaarusiortoqarnissaanut kissaateqarpoq. Siumumeersoq Aslak W. Jensen kalaallisut programimik ikiuutinik sanasoqarsinnaanissaanut kissaateqarpoq. Kiisalu Demokraatineersoq Nivi Olsen naqinnernik ilisarinnissinnaanngitsunut misissuummik kalaallisuumik ineriartortitsisoqarlunilu atuutilersitsisoqarnissaanik kissaateqarpoq.
Inatsisartut oqaluuserisassat taakkua pingasut ataatsimoortillugit siullermik oktobarip 19-ani oqaluuseraat. Partiit tamarmik siunnersuutit ilalerlugit Inatsisartut kulturimut, ilinniartitaanermut, ilisimatusarnermut ilageeqarnermullu ataatsimiititaliaanut suliarineqartussanngorlugit ingerlateqqippaat. Maannalu ataatsimiititaliaq isumaliutissiissummik naammassinnissimalerpoq.
Inatsisartullu isumaliutissiissut akuerissappassuk, siunnersuutigineqartut piviusunngortinneqartussanngorlugit Naalakkersuisunut suliakkiutigineqassapput.
Sulingasuartoqarnissaa neriuutigaa
Inatsisartunit maanna ukkatarineqalernerat illit naqinnernik ilisarinnissinnaanngitsumut anaanaallutit qanoq igaajuk?
- Neriuppunga meeqqat inuusuttullu naqinnernik ilisarinnissinnaanngitsut, oqartussaniit puigorneqarsimasut, sulingasuarfigineqarlutik aallartinneqarumaartut. Ukua inuit pineqartut Nunatsinnut tunniussassaqarnerat, assigiinngitsunillu aamma piginnaasaqarnerat atorluarneqartariaqarmat. Ingammik ukiuni makkunani eqqartorneqartartillugu pisariaqartitsinerpaat kivittariaqarigut, kikkut tamarmik atorfissaqartinneqarmata. Kisianni ullumikkumut oqaasiinnaapput. Ingammik naqinnernik ilisarinnissinnaanngitsumut anaanaalluni. Uggornartorujuuvoq killiffipput, Paarnannguaq Mathiassen oqarpoq.
- Kisianni neriuppunga amerlanerussuteqartunit taperserneqarluni sulingasuarnerit aallartinneqassasut, Paarnannguaq Mathiassen, naqinnernik ilisarinnissinnaanngitsunut angajoqqaanut siunnersuutissaqartoq, taama oqarpoq.
- Uteriillutik, tunniutiinnaratik, meeqqatik nalunnginnerpaagamikkit ikiortissanik, periarfissanik, ilitsersorneqartarnissamik siunnersorneqartarnissamik kommuninut uteriittassasut.
