Amnestyp suiaqatigiit Savalimmiuni katissinnaannginnerat isornartorsiorpaa

Thorshavnimi ukiut sisamassaat ataasinngormat GayPrideqarmat aqquserngit inunnik ulikkaarput.

Tamannalu Amnestyp Savalimmiuni immikkoortortaqarfiani generalsekretærip, Katrin á Neystabø-p nuannaarutigaa.

- Pissutsit ukiut tallimat, qulit, matuma siornarnit pitsaanerupput. Pitsanngoriartorpoq, Katrin á Neystabø oqarpoq.

Erseqqissaatigaalu suiaqatiminnoortunik immikkoortitsineq 2006-imi inerteqqutinngormat.

Amnesty: suiaqatiminnik aappallit aappariittut nalunaarutigneqarsinnaalissapput

Nalunaarusiamili juunimi saqqummersumi Savalimmiuni Amnestyp, Danmarkimi immikkoortortaqarfik peqatigalugu, suiaqatigiit akornanni asanninneq pisortatigoortumik akuerisaannginnera isornartorsiorpaat.

Savalimmiunimi suiaqatiminnik aappallit aappariittut nalunaarutigineqarsinnanngillat katissinnaanatillu.

- Katissinnaanermut inatsit allanngortariaqarpoq, suiaqatigiit Savalimmiuni katissinnaalersillugit. Maannami taamak periarfissaqanngillat. Savalimmiuni Amnestyp siunissami qaninnermi tamassuma allanngortinnissaa suliassamisut pingaarnertut isigaa, Katrin á Neystabø oqarpoq.

Maanna naalakkersuisuusut suiaqatigiit katissinnaalernissaanut suliassaq suliariumanngilaat.

Katrin á Neystabøli naapertorlugu allanngortitsinissaq politikkikkut amerlanerussuteqarpasippoq. Suliniaqatigiiffiullu neriuutigaa tamanna, ukiaru Lagtingemut qinersisoqareerpat qaqinneqassasoq.

Oqaluffiit pinngitsaalineqassanngillat

Suiaqatigiit aappariittut nalunaarsorneqarsinnaanissaat suliassaq siulliussaaq:

- Isumaqarpugut pingaartorujussuusoq kikkulluunniit katinnissaminnut assigiimmik pisinnaatitaaffeqassasut, aamma suiaqatigiit. Pingaartipparpullu erseqqissassallugu tamanna upperisanut oqaluffinnulluunniit assigiinngitsunut pinngitsaaliissutaassanngitsoq. Upperisartik aallaavigalugu ilumoorsorisartik aallutissavaat. Tassunga Amnesty isumaqanngilaq.

Amnesty Europamiut Inuit Pisinnaatitaaffiinut Eqqartuussiviannut innersuussipput, tassani suiaqatigiit Italiami katissinnaannginnerat inuit pisinnaatitaaffiinik unioqqutitsinerusoq, Italiamiut aappariit arlallit ukioq manna taperserneqarput.

Danmarkip 2012-imi suiaqatigiit oqaluffimmi katissinnaalersippaat.

Nunatsinnilu tamanna ukiaru Inatsisartunit akuerineqassasoq ilimagineqarpoq.