Amminut tapiissutit tamanut assigiimmik tuninissaat KNAPK-p piumaneruaa
Isumaqatigiinniarusunnginneq pillugu KNAPK-p siulittasua, Leif Fontaine ullumi ima oqarpoq:
- Ammerivik naapikkatsigu, isumaqatigiissutissaq atsioriaannaq tunniukkaluarpaat. Kisianni uagut taamatut isumaqatigiinniarnissamut isumaqataasimasinnaanngilagut, Leif Fontaine oqarpoq.
Piniartut illoqarfinni avannaani Ilulissaniit kujataani Nanortalik tikillugu puisit amiinik ataasinngormat siuliani februaarip 15-iani tunisisinnaajunnaarput. Pingaarnersiuineq tunngavigalugu illoqarfinni tunitsiviit matuneqartut, Great Greenlandimi pisortaq Henrik Estrup oqarpoq.
Tunitsivinnik pingaarnersiuisoqarnissaa siunertaralugu KNAPK isumaqatiginninniarfigineqarsimagaluartoq, Great Greenlandimi pisortaq sisamanngormat aamma oqarpoq.
Kisianni Leif Fontainep oqarnera naapertorlugu, Nunatta Ammerivianiit isumaqatigiissutissatut siunnersuutit aalajangiutereerlugit saqqummiunneqarsimapput.
KNAPK-p Naalakkersuisunut septembarip 29-ani piumasaraa, puisit amiinut tapiissutit allanngortinneqassanngitsut. Tassalu ilaasortat peqatigiiffinnut 72-inut agguataarsimasut assigiimmik atugaqartinneqartariaqartut.
- Aningaasaliissutit agguataarlugit tamanut periarfissaanissaat uagut orniginerusimagaluarparput, aalisartut piniartullu siulittaasuat oqarpoq.
Puisit amiinik tunisisarneq pillugu Naalakkersuisut aamma Nunatta Ammeriviata akornanni sullissinissamut isumaqatigiissummi tunngaviupput puisit amii 55.000-it ukioq manna tunineqassasut aammalu ameq ataaseq agguaqatigiisillugu 310 koruuninik akeqartinneqassasoq.
Taamaammat KNAPK-p piumasaqaataa piviusunngortinneqarpat, piniartut ataasiakkaat ikittuinnarnik 2010-mi tunisisinnaassapput.
- Tassami taamaappoq. Amminut tapiissutit aalajangerneqarnerat tunngavigalugu aalajangertoqarnera allanngortissinnaanngilarput, aamma akuersaarparput, Leif Fontaine oqarpoq.
KNAPK-miit siunnersuutigineqarsimagaluarpoq, amminik tunisineq siornatigutut marsip 15-iata tungaanut ammatiinnarneqassasoq, ullullu taassuma tungaanut isumaqatigiinniartoqassasoq. Kisianni Leif Fontainep oqarneratut Naalakkersuisunut ilaasortaq akissuteqarsimanngilaq. Radioavisiminngaanniit aamma Ane Hansen oqaaseqartinniaraluaratsigu iluatsitsinngilagut.
