Ammerinermiit Nukissiornermut
Ammerivimmi pisortaaneq Henrik Estrup Nukissiorfinni pisortanngortussanngorpoq. Taassuma taarsissavaa, Svend Hardenberg qaammatit arlaqanngitsut matuma siornagut pisortaajunnaartoq.
Allattoq Elisa Isaksen
juunip 10-at 2011 13:00
Henrik Estrup Naalakkersuisut Nukissiorfinni pisortatut atorfinitsippaat, atorfinitsitsinermut ataatsimiititaliap aamma suliffeqarfiup siunnersuisarfiup innersuussuteqarneratigut, qinnuteqartut 24-t akornanni Henrik Estrup toqqarpaat.
Nukissiorfinni pisortanngortussaq Nunatsinni ukiuni 23-ni najugaqareersoq, Namminersorlutik Oqartussat tusagassiuutinut nalunaarumminni oqaatigaat. Pisortatut ingerlatsinermik misilittagaqarluarpoq, Nunatta Ammeriviani pisortatut misilittagaqarnermi saniatigut Nuuk Imermi pisortatut aamma tunisassiornermi qullersatut ilaatigut misilittagaqarpoq.
Henrik Estrup ukiap ilaagut Nukissiorfinni pisortatut aallartissaaq, suliffimminut qimalikkaminut tunngatillugu suliat kingulliit naammasseqqaarniaramigit.
