Ammassanniarneq Islandimi kinguariartungaatsiartoq

Kalaallit Nunaat Islandip imartaani ammassannik aalisakkanillu allanik aalisarsinnaavoq.

Polar Seafoodip umiarsuaa nutaaq, Polar Amaroq islandimiut imaanik misissuivialu Islandip imartaani ammassannik januaarip ingerlanerani suleqatigiillutik misissuipput. Ammassappassuarnilli nassaartoqanngilaq.

- Pakatsinartoq oqaatigineqarsinnaavoq. Ataatsimoortillugit ikittuinnarnik takusaqarpugut, islandimiut imaanik misissuiviani ilisimatusarnermi siuttuusoq, Birkir Bárðarson islandimiut nutaarsiassaqartitsivianut mbl.is-imut oqarpoq.

Islandimi 1963-imi ammassanniartoqartalerpoq, aatsaallu siullerpaamik ukiut marluk tulleriissiinnarlugit ammassannik nassaartoqanngilaq.

Tamanna islandimiut suliffeqarfiinut aalisakkerisunut ernumanartoqartitsivoq, taakkumi ammassaat ilaatigut Japanimut tunineqangaatsiartartut nioqqutissiarineqarnerat pingaaruteqangaatsiarsoraat.

- Ammassaat ukiup affaani amigaatigissagutsigit tamanna inuit takorluunngisaannit aningaasatigut maani (islandimi aaqq.) imarsuullu akiani niuerfitsinnut sunniuteqarnerussaaq, Sigurgeir Brynjar Kristgeirsson, Vinnslustöðinimi pisortaaneq islandimiut nutaarsiassaqartitsivianut mbl.is-imut oqarpoq.

Nunatsinnit ernumasoqartoq

Polar Pelagicip pisortaata, Henrik Lethip tamanna aamma ernumanartoqartippaa.

- Taamaannera neriunaateqarpasinngilaq, Henrik Leth oqarpoq.

- Aap, ammassattaqannginnissaa ernumagaara. Kisianni ajornavianngilagut allanimmi aalisagaqarpoq.

Polar Pelagicip ammassanniartarnermi saniatigut makrelit, saarullernat ammassassuillu aalisartarpai.

Taamaakkaluartorli ammassanniartarneq ukiukkut amigaatigineqartarpoq.

Islandimi siorna ammassaqanngitsoq, Henrik Lethip oqaatigaa, ukioq mannalu aamma ammassattassaqarpasinnani.

- Ammassanniarneq maannakkut aallartittussaagaluarpoq, ammassannilli ajoraluartumik nassaartoqarpasinngilaq. Taamaammat ukiup sinnera ammassanniartoqassagunanngilaq, Henrik Leth oqarpoq.