VIDEO Amiisup Prebenip periarfeerunneqarnera Aasianni ernummatigineqartoq

48-nik ukiullip ikinngutai aliasupput qaammatillu tallimat matuma siorna pinerluttoqarsimasinnaanera ernumassutigalugu.

- Taamatut periarfeerutiinnarnera assut eqqumiippoq.

- Inuk tupinnaannartuuvoq. Pissarsiarineqarsinnaajuartoq suliffimminillu paarsilluartoq. Taava imaasiallaannaq periarfeeruppoq. Taamaalinissaa ilimananngilluinnaraluarpoq. Paasiuminaappoq, kammalaataa Elmer Absalonsen KNR-imut taama oqarpoq.

Aamma atuaruk Qalipaasoq Aasianni suli ujaarineqarpoq

Nikallungasimanngilaq
Amiisumik Prebenimik taagorneqartoq kingullermik takuneqarpoq Aasianni unnuakkut Qaqqap Tunuatigut Killerpaatigullu scooterini kaassuarlugu pisuttoq.

Elmer Absalonsenip Preben Nielsen unnuk taanna naapisimaarsimavaa.

- Ajortoqarneranik malussarfiginngilara. Oqaluuterujoorpugut immitsinnullu quianartunik oqaluttuaqattaalluta. Sunnguamik malussarfiunngilaq, kammalaataa oqarpoq.

Illoqarfimmiut ernumapput
Aasiammiut allat Amiisup Prebenip qanoq pisimasinnaanera taamaammat ernummatigaat.

- Toqqissisimananngitsorujussuuvoq. Taamatummi pisoqaqqissinnaanersoq naluarput.

- Nassaarineqanngimmat eqqarsarnarpoq pinerluuteqarsimasumik akornatsinniittoqarnersoq. Illoqarfitsinni taamatut pisoqartarnera qaqutigoortuuvoq, Mette Hendriksen oqarpoq.

Politiit Preben Nielsenip qanoq pisimasinnaanera paasiniarlugu takussutissaasinnaasunik ujaasinerat kinguneqanngitsoorpoq.

- Suliamut matumunnga tunngatillugu allaanerussutigaa nikallungasimaneranut imaluunniit pinerluttoqarsimasinnaaneranut uppernarsaatissanik ersiutaasinnaasunillu peqannginnera. Taamaammat qanorluunniit pisoqarsimasinnaavoq, Arne Sandgreen Reimer, Aasianni Qaasuitsup politiivineersoq oqarpoq.

Taamaammat politiit Danmarkimit ikiortissarsiortariaqarsimapput suliarlu suli ammatinneqarluni. Arne Sandgreen Reimerili isumaqanngilaq innuttaasut pinerluttoqarsimasinnaaneranut ernumanissaminnut pissutissaqartut.

- Pinerluttuliortoqarsimaneranut uppernarsaatissaqanngilaq, taamaammat ernumassutissaqanngilaq, taama oqarpoq.

Neriuutaaruttoq
Elmer Absalonsenip kammalaatimi nassaarineqarnissaa ilimagiunnaarsimavaa.

- Neriuutaarutereerpunga. Ajoraluartumik. Sumiissinnaanera nalulluinnarpara, Elmer Absalonsen oqarpoq.

Preben Nielsenip periarfeerunneqarneranit ullut pingasut qaangiummata scooteria saviminikunut eqqaavissuarmi nassaarineqarpoq. Tamatumalu kingorna takussutissanik allanik saqqummertoqaqqissimanngilaq.