Amigartoorutit ilimagisamit amerlanerupput
Kalaallit Nunaanni Naatsorsueqqissaartarfiup suleqatimik qallunaat kukkussutigisimasaat paasivaat, tassalu 2002-miilli nunatsinnut nioqqutissanik eqqussuinitsinni ukiut tamaviisa 80 aamma 100 millionit koruuninik amerlanerusunik eqqussuisarsimavugut, niuernermi oqimaaqatigiissitsinermi takutinneqartunut sanilliullugu.
Taamaattumik niuernermi amigaartoorut naatsorsuutigineqartumiit minnerpaamik 800 million koruuninik annertuneruvoq.
- Nioqqutissat Kalaallit Nunaannukartut Danmarki aqqusaarlugu ingerlanneqartartut, 2002-miit 2011-mut nioqqutissatut eqqussuuneqartutut naatsorsuunneqarsimanngillat. Taamaattumik eqqussuinerput ilimagineqartumiit annertuneruvoq, taamaattumillu niuernermi amigartoorutip suusupagineqarneranik kinguneqarsimalluni, Naatsorsueqqissaartarfik tusagassiuutitigut nalunaarummini taama allappoq.
Taamaalillunilu akisussaaffik Danmarkimi naatsorsueqissaartarfimmut suliassanngortinneqarpoq, kukkunerli ajuusarutigineqarpoq qaammatillu naanerani ukiuni kingullerni qulini nunanik allanik niueqateteqarnermut takussutissiat nutaat saqqummersinneqassapput.
Nunanik allanik niueqateqarnitsinni ukioq kingulleq aatsaat taama aamma amigartooruteqartigaagut, taakku 2,2 milliardit koruuniugamik. Allatut oqaatigalugu; nioqqutissat eqqussuutavut 4,4 milliardit koruuninik naleqarput, avammulli tunisavut taamaallaat 2,1 milliardit koruuninik naleqarlutik.
