Amernik tunisassiorneq Canadami annertusiartorpoq

Canadami nunap ilaani Ontariomi North Bayimi sapaatip-akunnerata siuliani amminik kaattaassisoqarmat, nannup amiinit suliat Kinamiunit soqutigineqartorujussuupput.

Nannup amiinit suliat ukiualunnguit matuma siornatigut 5000-it koruunilerlugit pisiarineqarsinnaasimapput, ullumikkulli 22.000-it dollarit tikillugit, imaluunniit 120.000-it koruunit tikillugit akeqarsinnaalersimallutik, aatsaat taama isertitsissutaasinnaalersimallutik.

Nannut Qeqertaalummi, Hudsonillu kangerliumanersuata kimmut sineriaani pisarineqartarput, ammillu 120.000-it koruunilerlugit pisiat Kinami akisunerujussuanngorsinnaapput, tassani suliareqqinneqarnermikkut akisunerujussuanngorsinnaallutik, assersutigalugu natersuanngortinneqartarlutik.

Nanoq kiffiagaq Kinami 500.000-it koruunilersillugu tunineqarsinnaavoq, natersuarlumi aamma taama akeqarsinnaalluni.

Nannup amiata 120.000-it koruunilersillugu North Bayimi tunineqarnerata saniatigut, ammit allat aamma North Bayimi sapaatip-akunnerata siuliani tunineqarput.