Amerlanerussuteqartut taaseqataapput: Parisimi isumaqatigiissummut nunarput ilanngutissaaq

Kalaallit Nunaat Parisimi isumaqatigiissummut ilanngutissasoq Inatsisartuni amerlanerussuteqartut akuersissutigaat.

Parisimi isumaqatigiissut pillugu suliaq sivisusimavoq. 

Naalakkersuisut siulittaasuata Múte B. Egedep (  IA )  novemberimi 2021-mi nalunaarutigaa, Kalaallit Nunaat Parisimi isumaqatigiissummut ilanngunnissaanut kissaateqartoq. 

Taannali iluatsinngilaq,  Partii Naleraq IA-lu  naalakkersuisoqatigiikkunnaarmata, Siumullu naalakkersuisoqatigiilerlutik. 

Kalaalit Nunaat Parisimi isumaqatigiissummut ilanngutissanersoq Siumumit tunuarsimaarfigineqarpoq, tapersersornerlugu  isumaqatiginnginnerluguluunniit erseqqissumik oqaatigineqarani. 

- Parisimut isumaqatigiissummut ilanngunnermi iluaqutit ajoqutaasinnaasullu  takussutissartaannik amigaateqarneq pissutaavoq, Siumup siulittaasua Erik Jensen KNR-imut oqarpoq.

Nalornissutigineqartut maanna qulakkeerlugit paasineqarput, maanna partii isumaqatigiissummut taaseqataanissaminut piareerpoq

Nammineq piumasarisat aallaavigalugit

Aalajangigassatut siunnersuut Inatsisartut Eqqissisimatitsinermut Avatangiisinullu ataatsimiititaliaata eqqartuussissuserisumut misissuisitsinerani erserpoq, silap pissusaa pillugu oqartussaaffik Kalaallit Nunaannit oqartussaaffigineqalernikuummat, silap pissussaa pillugu pisussaaffiit isumaqatigiissutillu Naalakkersuisut suliarisinnaagaat. 

Taamaattumik Kalaallit Nunaat nammineerluni Parisimi isumaqatigiissummut ilanngunniarluni kissaateqarnini Naalagaaffiit Peqatigiinnut nalunaarutigissavaa.

Kalaallit Nunaat Parisimi isumaqatigiissummut ilannguppat, silaannarmik mingutsitsisumik CO2-mik aniatitsinini Danmarkimisulli  annikillisitsinissamut pisussaaffeqassanngilaq.

Taamaattorli Kalaallit Nunaat nammineerluni silap pissusianut periusissiamik  suliaqassaaq, NDC-mik taasamik peqarput. (  Nationally Determined Contributions).

- Eqqartuussissuserisumik misissuisitsinitsinni qulakkeerparput, silap pissusaa pillugu isumaqatigiissut qanoq ittoq isumaqatigiissutigineqassanersoq kalaallit inuiaat aalajangigassarigaat, Erik Jensen oqarpoq. 

- Naalakkersuisut Naalagaaffiit Peqatigiinnik toqqaannartumik isumaqatiginniarnissamut Inatsisartunit pisinnaatitsissummik akuerineqartassapput, Erik Jensen oqarpoq.

Taamaattumik isumaqatigiissut qanoq ittuussanersoq Inatsisartut nammineerlutik aalajangertassavaat,  Erik Jensen oqarpoq.

Silap pissusaanut anguniagaq aningaasatigut kinguneqartussaanngitsoq

Nunat tamarmik Parisimut isumaqatigiissummut ilanngunnikut silap pissusianut periusissiamik suliaqartartussaapput NDC-mik taasamik peqarput.  (  Nationally Determined Contributions). NDC-ip Kalaallit Nunaannut aningaasatigut kingunerisassai,  Naalakkersuisuit taassuma qanoq ittuunissanik Naalakkersuisut toqqaanerat aalajangiisussaaq.

Kalaallit Nunaat Parisimi isumaqatigiissummut ilanngukkuni immikkoortunut arlaqartunut peqataannginnissaminut periarfissaqarpoq.  Assersuutigalugu aatsitassanik piianeq aalisarnerlu pillugit Parisimi isumaqatigiissummut ilanngunneqannginnissat toqqarneqarsinnaapput, tassani silaannarmik mingutsitsisup CO2-p aniatinneqarneranut annikillisaaniarnermi. 

Parisimi isumaqatigiissumut ilanngunnissamut nangaassutip atorunnaarsinneqarnissaata oqallisigineqarnerai aningaasaatigut kingunerisinnaasai pillugit Siumumit isumakuluutigineqarpoq.

Maannali qulakkeerneqarpoq.

- Aningaasarsiornikkut ineriartornermi Parisimi isumaqatigiissut akornutaanavianngilaq. Nunaqarfinni, avinngarusimasuniittuni aalisartuni piniartunilu Parisimi isumaqatigiissumit artukkerneqarnavianngillat, Erik Jensen taama oqarpoq.

Siumut siulittaasuata ilanngullugu oqaluttuaraa, Parisimi Isumaqatigiissutip suliarineqarnera Inatsisartut suleqatigalugit pissasoq.