Amerikamiut tikeraarnissaat: Politiit maanna oqaaseqartut
Amerikamiut qullersaqarfianit atorfillit kiisalu præsidentip tullersortaata nulia, Usha Vance Nuummut Sisimiunullu sapaatip akunnerani matumani tikeraassapput.
Tikeraarnerat pissutigalugu isumannaallisaaneq sukannernerutinneqarpoq, Kalaallit Nunaanni Politiit tamanna pissutigalugu danskit politiivinit ikiorneqarnissaminnik noqqaassuteqarput. Politiit tusagassiuutinut nalunaarummi allapput.
- Annertuumik pisoqassatillugu politeeqarfinnit allanit ikiorneqarnissamit noqqaassuseqarneq nalinginnaasumik periuserineqartarpoq, politiit pisortaata tullia, Gideon Qvist oqarpoq.
Politiit pisortaata tulliata politiit pingaaruteqartumik tikeraartoqassatillugu immikkut ittumik suliniuteqartoqarnissaa pisariaqartinneqartussatut nalilertuaannaraat oqaatigaa.
Danskit politiivinit ikiorneqarnerup saniatigut amerikamiut sillimaniarnermut sulisutik namminneq aamma nassarpaat.
Amerikamiut sakkutuuisa timmisartui marluk Nuummut sapaammi tikipput, biilit immikkut ittut ilaatigut userineqarput. Politiit oqarnerat naapertorlugu taama tikeraartoqarnera tamanna nalinginnaasuuvoq.
Suliaqarnissamut atatillugu Kalaallit Nunaanni Politiit suliniuteqarnermut tunngasumik annerusumik paasissutisseerusunngillat.
Politiit Nuummi politeeqarfimmi nalunaaqutaq pingasunut tusagassiortunik katersortitsissapput.
Politiinut ilassinninnissamut kaammattuuteqartut
Kalaallit Nunaanni Politiit Nuummi aqqusinermi politiit takussaanerussasut Facebookimi quppernerminni allappaat.
- Sapaatip akunnerani uani Nuummi Sisimiunilu aqqusinermi politiit nalinginnaasumik amerlanerit takussaanerussapput, allagaanni allassimavoq.
Tassungalu atatillugu innuttaasunut danskinut suleqatiminnut ilassinninnissaannik kaammattuuteqarput.
