Aluu Airlines Namminersorlutillu Oqartussat isumaqatigiinngillat
Taamannalli saqqummiussinera attaveqaqatigiinnermut naalakkersuisoqarfimmi allaffimmi pisortap Andreas Østbirkip ilisarinngilaa.
- Marlunnik neqeroorusiorpugut; apriilip ulluisa 25-anni, maajillu ulluisa 18-ianni - taakkuali pillugit isumaqatigiinniarnissanut aggersarneqanngilagut, oqarfigineqaannarluta angallassisartunik allanik oqaloqateqartut, taamaammallu kikkut isumaqatigiinniarneqassanersut suli qulakkeerneqanngitsoq, aammalu neqeroorutitta qanoq inerneqarumaarneranik saqqummiussisinnaanata, Aluu Airlinesimi pisortaq, Pele Broberg KNR-imut oqarpoq.
Kiffartuussinissamut isumaqatigiinniarnerni piginneqatigiiffini naammattumik peqataasimanngitsoq taanna isumaqarpoq.
Namminersorlutilli Oqartussat taama oqarneq ilisarinngilaa.
- Bristow Group Aluu Airlinesilu oqaloqatigilluarpagut, taamaammallu oqaloqatiginnissimannginneraaneq Namminersorlutik Oqartussanut ilisarnanngilaq, oqaloqatigaagummi, attaveqaqatigiinnermut naalakkersuisoqarfimmi allaffimmi pisortaq Andreas Østbirk KNR-imut oqarpoq.
