Aluu Airlines kiffartuussinissamik isumaqatigiissutinut tamanut neqeroortoq
Qulimiguulinnut mittarfinnut katillugit 46-sunut kiffartuussinissamik isumaqatigiissutit tunngavigalugit timmisartuussiffigineqartuni Air Greenland taamaalilluni unammillerneqarpoq. Aviisi Atuagagdliutit ullumi saqqummersoq taama allaaserineqarpoq.
Aviisi naapertorlugu Aluu Airlines marlunnik tunngaveqartumik ingerlatsissaaq, kiffartuussinissamik isumaqatigiissutinik isertitanik qulakkeerinnittussanik kiisalu niuernerpalaartumik tunngaveqartumik timmisartuussinernik. Taakku saniatigut aamma Nerlerit Inaat Ittoqqortoormiit eqqaanniittoq kiisalu Qaanaaq, tapiissuteqarfigineqarlutik aamma ingerlanneqartut, Aluu Airlinesip timmisartuussiffigerusuppai.
Aamma atuaruk Aluu Airlines qulimiguulinnik angallassisalerusupput
Aluu Airlinesip pisortaata Pele Brobergip Nerlerit Inaannut Qaanaamullu timmisartuussisarnissamut timmisartut suluusallit sorlerpiaat atorneqassanersut oqaatigerusunngikkallarpaa.
Qulimiguulinnilli sorlernik atuisoqarnissaa pillugu, pisortap Atuagagdliutinut oqaatigaa, qulimiguulik Sikorsky S-92A atorneqassasoq. Taanna avataasiorluni uuliasiornermut ineriartorteqqaarneqarsimavoq S-61-itullu angitigingajalluni. S-92A S-61-imit nukittunerullunilu kivitsisinnaaneruvoq.
Aluu Airlinesip kiffartuussinissamik isumaqatigiissutit pissarsiarissagunigit 2017-imi januaarip aallaqqaataanit timmisartuussinissaminut piareersimassaaq.
Aamma atuaruk VIDEO Aluu Airlines timmisartornerup akikinnerulernissaanik neriuuteqalersitsivoq