Alleqqukkut napisimasoq: Inuk ataaseq qaartitsisoqarnerani ajutoornermi kingorna napparsimmavissualiaanneqartoq
Nuummi betonngiliorfimmi sulisoq qaartitsisoqarnerani ajutoornermi ajoqusingaatsiarpoq.
Qaartitsisoqarnerani ajutoorneq pingasunngornermi ualikkut nalunaaqutaq pingasunut pisoq, nittartakkatigut tusagassiorfik, Sermitsiaq.ag allappoq.
Sulisoq qaartitsisoqarnerata nalaani assaassuarnik ujaqqanik piiaavoq.
Sermitsiaq.ag-p allaaserisaa naapertorlugu qaartiterutissat siunertarineqartoq malillugu qaarsimanngitsoq qaarsimagunarpoq.
AAMMA ATUARUK Qaqortumi qaartitsisoqarnerani ajutoortoqartoq
Ajoqusersimasoq ajutoornerup aqaguani sisamanngornermi Københavnimut napparsimmavissualiaanneqarpoq. Tassanilu ajoqusernerminik ilaatigut alleqqukkut ulussallu saarnginik napisimanerminik nakorsarneqassalluni.
KNR-ip betonngiliorfik pisumut atatillugu sulisullu qanoq innera pillugu annerusumik oqaaseqartinniaraluarpaa, tamannali suli iluatsissimanngilaq.
Sulisoq ajunngitsoq, betonngiliorfiup pisortaata, Nicolai Mogensenip Sermitsiaq.ag-mut oqaatigaa.
Politiinit pigaartup pisumut atatillugu KNR-imut oqaaseqarnissaanut Sulivinnik Nakkutilliisoqarfimmit paasissutissarsinissaq politiit utaqqeqqaarpaat.