Qaqortumi qaartitsisoqarnerani ajutoortoqartoq
Nukissiorfiit Qaqortumi erngup aqqutaanik sanaartuleruttorput, suliarineranilu pingasunngornermi ajutoortoqarluni.
Qaqortumi erngup aqqutaanik suliaqarnermut tunngatillugu qaartitsisoqarnerani pingasunngornermi ajutoortoqarpoq.
- Inunnik qujanartumik ajoqusertoqanngilaq, atortulli ajoquserneqarlutik. Ajutoorneq qanoq pisimasimasinnaanersoq ajutoornermillu eqqugaasut qanoq taarsigassarsitinneqassanersut, sanaartugassanik suliarinnittup suliaqarnermut akisussaasuusup misissuleruttorpaa.
Nukissiorfiit nittartakkaminni naatsumik taama nalunaaruteqarput.
Sermitsiaq naapertorlugu Qaqortumi ilinniartut ineqarfii qaarsumit ujaqqanik eqqorneqarpoq.