Allattami ajugaasut toqqarneqartut

Ukioq manna unammisitsinermi "inissaqartitsineq" qulequtarineqarpoq peqataasullu assigiinngitsorpassuartigut isummersorfigisimavaat.

Kinaassutsimik qularinninnermit aappariinnermi misigisanut.
Ajugaasut quliusut ilaatigut pinngortitamut, isumakkeerinninnermut, saammaateqatigiinnermut eqqaamasaarunnermulluallaat tunngasunik allaaserisaqarput.

- Allatta! 3.0!-mi ajugaasut ilisaritissallugit tulluusimaarutigaarput! Allatarpassuit tigusagut takullugit qiimmallaataasimaqaaq, naliliisullu inuusuttunik toqqaanerminni assut ulapissimapput, Allatta 3.0-mi ingerlatsisoq Mia Skifte Lynge oqarpoq. 

Naliliisuupput; siornatigut ajugaanikoq Sørine Steenholdt, ilusilersuisartoq Arny Koor Mogensen aammalu lektori Birgit Kleist Pedersen. Taakku peqatigiillutik allatat nassiunneqartut tamaasa atuarlugillu nalilersorpaat. 

- Allannermi qulequtarineqartoq ”Inissaqartitsineq” peqataasut assigiinngitsorpassuartigut atorsimavaat. Taamaattorli sammisat ilaat uteqqiapput, taakkunanilu pitsaanerpaat toqqarpagut. Allatat ullumikkut nunatsinni pissutsinut pisunullu ersersitsisutut oqaatigineqarsinnaapput

Unammisitsineq inuusuttunut 15-it 30-llu akornanni ukiulinnut ingerlanneqarpoq. NAPA Milik Publishing, Nunatta Atuagaateqarfia Kalaallit Atuakkiortullu suleqatigiillutik aaqqissuussaraat.

Ajugaasut allannermut Tasiilami ullut sisamat pikkorissarneqassapput, Islandimullu Danmarkimullu nunani avannarlerni isumassarsiorniarlutik septembarimi angalassallutik.

Allatat qulit Milik Publishingimit atuakkami ataatsimi katersorneqarlutik ukiassalernerani saqummersinneqassapput.

Ajugaasut kikkuuneri uani takuneqarsinnaapput.

Novelle
Najannguaq Berthelsen, 18 år, Nuuk 

Paninnguaq Møller, 28 år, Nuuk 

Navarana Lennert, 30 år, Nuuk 

Onu Didriksen, 18 år, Nuuk 

Erninnguaq Reimer, 29 år, Nuuk 

Malik Sophus Schøller Jørgensen, 24 år, Nuuk

Essay
Katrine Poulsen, 26 år, Nuuk 

Tukumminnguaq Nykjær Olsen, 30 år, Nuuk 

Lyrik
Stine Buur Hvistendahl, 25 år, Nuuk 

Kaaleeraq M. Andersen, 25 år, Uummannaq