#taasinerittitusindtit: Allannguiniarneq nutaaq allannguinermik pilersitsillunilu paqumisunnernik unitsitsissasoq
Tilioq innarluutillit pisinnaatitaaffimminnik pisariaqartitaminnillu ikiorneqarnissaannik qulakkeerutaasussanik ulluni makkunani Ilulissani isumasioqatigiissitsillunilu ataatsimeersuartitsivoq.
- Allannguinerit pisariaqarluinnartut aatsaat ataatsimoorluta pilersissinnaavagut, innarluutillit illersuisuat, Anja Hynne Nielsen ammaanermi oqalugiarami oqarpoq.
Taamaammat nunatsinni innarluutillit peqatigiiffiata allannguiniarneq #taasinerittitusindtit pilersippaa.
Politikerinut nukingertitsissasoq
Allannguiniarneq facebookikkut quppernermi ammasumi innarluuteqarnermik eqqugaasimasut tamarmik oqaluttuassaminnik misigisimasaminnillu avitseqatiginninnissamut periarfissaqarfiuvoq.
Taamaalillutik aaqqissuussaanermit qanoq ilaginnarneqarsimanerminnik nassuiaateqarfissaqarput.
- Innersuutit titusindtit Kalaallit Nunaanni inuit inarluutilippassuusut arlaatigut innarluuteqartut – 15 procentit missaaniipajaartut – innuttaasullu amerlanerit ulluinnarni inunnik piginnaasakillisumasunik unammilligassalinnik immikkoortinneqarnermillu misigisaqartartunik nalunngisaqarput, Tilioq paasissutissiivoq.
Taamaalillutik ataatsimoorlutik allannguinerit pisariaqartut kimigiisissutigisinnaallugillu inuit pisariaqartitsinerpaat pitsaanerusumik atugassaqalernissaat aaqqiissuteqarfigineqarnissaallu qulakkeersinnaagaat, innarluutillit illersuisuata oqariartuutigaa.
- Qinikkat uunngaannaq aaqqissuussat siunissarlu ungasinnerusoq eqqarsaatigalugu aaqqissuussaq misissussagaat inunnullu innarluutilinnut pitsaanerusumik atugassaqartitsilernissamik sukkanerusumillu ikiuinissamik pilersitsinissaat kissaatigaarput, Anja Hynne Nielsen oqarpoq.
Kinaassutsimik isertuussilluni oqaluttuassamik avitseqatiginninnissaq aamma periarfissaavoq.
Paqumiginnikkunnaarsitsiniartut
Allannguiniarnermi innarluuteqarnermut atatillugu paqumiginnikkunnaarsitsinissaq aamma taakku unammillernartitaminnik kisimiinnginnerannik takutitsinissaq aamma siunertaapput.
- Innarluuteqarnerup paquminarunnaarsinneqarnissaanut atatillugu oqaluttuassartamik avitseqatigiiffeqarsinnaatitserusuppugut. Tamanna ataasiakkaat kisimiinnginnerannik takutitsiniarneruvoq. Amerlasuut aaqqissuussaanermi assigiimmik unammillissuteqarnikuupput. Unammillernerit sivisullutillu sakkortusinnaapput, Anja Hynne Nielsen oqarpoq.
Allannguiniarneq danskit qaammarsaanerannit #enmillionstemmer isumassarsiaavoq, tassani innarluutillit pillugit susassaqarfimmik politikkikkut ukkassilersitsisoqarpoq aamma Danmarkimi innarluutillit atugaannik pitsannguinissamut innuttaasunit siunnersuuteqartoqarluni.
#enmillionstemmer Facebookimi quppernermini 38.000-inik ilaasortaqarpoq, allannguiniarnerlu #taasinerittitusindit 120-nik ilaasortaqalereerlunilu aqqaneq-marlunnik allagarsiussaqarfiulereerluni.
