Allakkat nunatta avataanut nassiunneqarsinnaanngitsut

Nunatsinni innuttaasut nunatta avataanut timmisartoq aqqutigalugu januaarip 24-ianili nassiussisinnaajunnaarallarput.

Tamanna Danmarkimi angallannermi aqutsisoqarfiup timmisartukkut Nuup mittarfianiit nunatta avataanut nassiussisarnernut akuersissummik atorunnaarallarsitsineranik peqquteqartoq.

Greenland Airports facebookimi paasissutissiipput.

“Misissuisarnerni ingerlariutsit ataasiakkaat suli inissilluaqqannginneri” peqqutigalugit akuersissummik atorunnaarallartitsisoqartoq, Greenland Airportsimi attaveqaqatigiinnermi pisortaq Mikkel Bjarnø Lund KNR-imut oqarpoq.

Annerusumilli paasissutisseeqqissinnaanani, piaartumilli aaqqinneqarnissaa neriuutigalugu oqaatigaa.

- Naatsorsuutigaarput piaartumik inissinneqassasoq. Mikkel Bjarnø Lund oqarpoq.

Tusass aamma eqqugaasoq

Atorunnaarallarsitsineq Tusassimut aamma kingunerluuteqartoq, Tusass facebookimi allappoq.

- Poortukkat allakkallu sullitatta nassiunniagaat, nassiunneqarsinnaannginnerannik isumaqarpoq tamannalu naammaginanngilluinnarpoq, Tusassimi niuernermi pisortaq Nikolaj Christoffersen oqarpoq.

- Tamanna saaffiginnittarfimmi sullissisuvut uani piffissami artukkerneqarnerunissaanik aamma isumaqarpoq, sullitavummi aamma nalornipput. Apeqqutigikkajuppaallu “allakkat qaqugu ingerlaqqissappat?” “Susoqartoruna?” “Qanoq sivisutigissava?”, taanna oqarpoq.

Kisianni apeqquterpassuit Tusassip akissuiteqarfigisinnaanagit Greenland Airportsillu akuersissuteqaqqilernissaa utaqqiinnartariaqaritsik ilanngullugu oqaatigaa.

Qaqugulu nassiussisoqarsinnaaleqqissanersoq Greenland Airportsip oqaatigisinnaanngilaa.

Allakkat poortukkallu Tusassimi uninngasut nassiussisoqarsinnaalernissaata tungaanut toqqoqqaneqarallassasut, nassiussisoqarsinnaaleqqippallu piaarnerpaamik nassiunneqassasut Nikolaj Christoffersenip erseqqissaatigaa.

Tusass facebookimi paasissutissiivoq.