Allagaq 1,5 Millioninik nalilik

Pisisup aqqa isertuussaasoq, Londonip ilaani Knightsbridge-imi kaattaassiviup Bonhamip nalunaarutigaa.
Tuluilli nutaarsiassaqartitsiviat Press Association allappoq Scottip allagaanik tuniniaaneq assortuussutaasimasoq.

Robert Scottip umiarsuaanik Terra Novamik assilisaq, ilisimasassarsiorlunilu angalaqataanik asseq alla tuniniarneqarput, ilimagisamiillu isertitsissutaanerullutik.
Asseq siulleq 55.000-it koruunilersillugu tunineqarpoq, aappaalu 137.000-it koruunilerlugu tunineqarluni.

Robert Scottip naggammik allagai timaani 1912-imi novembariugaa nassaarineqarput. Allakkat qaammatit arfineq-pingasut siornatigut allanneqarsimapput, ilisimasassarnermullu aningaasaliisimasumut Sir Edgar Speyerimut allanneqarsimallutik.

- Toqussarput qanilliartorpoq, Sydpolimulli annguppugut, angutitullu ileqqorissaartutut toqujumaarpugut, arnalli takoqqinngisassagut pillugit aliasuppunga, Scott ilaatigut allappoq, nangillunilu:

- Ullorsiutit ukua nassaarineqassagaluarpata uppernarsaataajumaarput ilavut toqujartortut naggatissaa tikillugu najoratsigik, Robert Scott allappoq.

Kaptajn Scott Sikuiuitsoq Kujallermut angalanermi unammillertiminut Norgemiumut Roald Amundsenimut ajorsarpoq.

Scott tammaarsimaffimminniit marsip ulluisa aqqaneq-aappaanni 1912-imi utimut angalanermini ajunaarpoq.