Aliikkusersuisartup tikeraarnera septembarimi takutinneqassaaq
Aammalumi aallakkaatitassiami nangeqattaartuusuni quliusuni Kalaallit Nunaat peqataassaaq, tassani inuup inuiaqatigiillu pissusaat, inooqatigiinnermi pissutsinik ilisimatuuniit ungalliunerusutut ajornartorsiuteqarfinnik taaneqartartut, pillugit quianarsinnaasortai sammineqassapput.
Jan Gintbergip tikitamini innuttaasut quianartumik asannittumillu attaveqarfigeqattaarlugit sungiusaqatigigai isiginnaartut misigissavaat, soorlu aliikkusersuinerni siullerni taamaassimasoq - tikikkaangamimi nalunaaquttap-akunneri 48-t qaangiukkaangata takutitsisarpoq, isiginnaartut imminnut ilaarutigalutik ilorraallannartumik illarnissaat anguniarlugu.
Taamatullu ujaasinerup Gintberg Nuummut pisippaa.
- Sumiiffimmi isummat pigiliutiinnarsimasat amerlasimappata, taava isumaqarpunga uummarissaataasinnaasunik equngalaartunillu ujaasinissamut pissutissaqartoq, taamaalilluta illarnartoq katersuuffigisinnaagatsigu. Naak Kalaallit Nunaanni ajornartorsiuterpassuaqaraluartoq imaanngilaq kalaallit quianartunnguanik suuteqaratik inunngorsimasut, Jan Gintberg oqarpoq.
Jan Gintberg Nuummi tikeraarnermini sulerisimanersoq septembarip 29-anni takuneqarsinnaavoq.