Aligoqqiinik Kalaallit Nunaanneersunik tunisassiorsinnaaneq uatsi
Naak alogoqqiit kusanarsarneqanngitsut sorsuffiunngitsunit suliarineqarsimasut tunisassiarinissaanut uppernarsaamik, tassa Kimberlite Proces, pilersitsiniarneq namminersorlutik Oqartussanit ingerlanneqaleruttortoq, isumannaagassat arlaqarput.
Aatsitassanut Ikummatissanullu Pisortaqarfimmi pisortaq Jørn Skov Nielsen oqarpoq periarfissat suli misissoritsik, aammalu tunisassiornissamut akuersissut piareernissaa sivisuumik ingerlasinnaasoq oqaatigalugu.
- Kalaallit Nunaannut suna pitsaanerpaanersoq misissornerani ilaatigut EU oqaloqatigaarput. Aaqqissuussamik akisuallaanngitsumik nassaartariaqarpugut. Kisiannili aligoqqiit Kalaallit Nunaanneersut taamatut tunisassiornissaani uppernarsaamik peqarniaraanni tapuliussassat arlaqarput. Aligoqqiit misissoqqissaarneqartariaqarput akitsuuserilerisullu ilanngunneqartussaallutik, Jørn Skov nassuiaavoq. Nunatsinni aligoqqiinik misissuisut pingasuusut Kangerlussuup kujataani, Maniitsup eqqaani kiisalu Qeqertarsuup tunuani ingerlanneqarput. Aligoqqiit 3.000-it missaaniittut nassaarineqareersut 0.5-imiit 1.0 millimeterisut angissuseqarput. Aligoqqik Kalaallit Nunaanneersoq anginerpaaq nassaarineqartoq Kangerlussuup kujataaneersoq fire millimeterisut angissuseqarpoq. Kimberlite Proces-ip anguniagaraa aligoqqinnik suliarinnittoqarnerani inuit pisinnaatitaaffiinik unioqqutitsisoqarsimannginnissaa, taamatuttaaq nunat inuit pisinnaatitaaffiinik pingaartitsisut kisiisa aligoqqinnik niuerfigineqarsinnaanissaat pingaartinneqarpoq.
Jørn Skov Nielsenip oqaatigaattaaq nunatsinni aligoqqinnik misissugassanik piiaasut pingasut siunissami kattullutik piiaaffivimmik aallartitsissappata, taava Kimberlite Proces pilersinneqarnissaa pitsaanerpaassasoq.
- Politkkerilli naggaterpiaani tamanna aalajangertussaavaat aligoqqiit Kalaallit Nunaannersut Kimberlite-Proces-imik uppernarsaateqartalissanersut, taamaaliornikkummi Europami tunisaalersinnaanerat aammaaneqassammat, Jørn Skov Nielsen oqarpoq.
