Alice Olsen KNR radiomi pisortanngorpoq
KNR radio nutaamik pisortartaarpoq. Alice S. Olsen pisortatut atorfinitsinneqarpoq.
- Nuannaarutigeqaarput Alice radiumi pisortatut ilisaritissinnaagatsigu, KNR-imi pisortaq Karl Henrik Simonsen oqarpoq.
- Alice pikkorilluinnartuuvoq suliumatuujullunilu, taamaattumik ukiuni tulliuttuni KNR Radiup ingerlannissaanut inerisarnissaanullu Alicep toqqaaneranut pissusissamisoortuusoq qularinngilarput.
Masaana Egede majimi radiumi pisortatut soraarluni Air Greenlandimi atorfinimmat Alice S. Olsen pisortaanngorallarpoq. Maannali atorfimmut ikkutivinneqarnini nuannaarutigaa:
- Tatiginninnermik tunineqarnera nuannaarutigeqaara periarfissinneqarneralu KNR radiup ineriartortinnerata ingerlateqqissinnaaneranut KNR-imi suleqatit pikkorissut suleqatigalugit, oqarpoq nangillunilu
- KNR-ip inuiaqatigiinni qitiusutut ataatsimoorfittullu inissisimanera pingaartuuvoq qilanaaraaralu suli tamassuma nukittunerulersinnissaa.
Aviisimi, radiumi tv-milu sulinikuuvoq
Alice S. Olsen 40-nik ukioqarpoq. Taanna 2003-mi tusagassiortutut soraarummeerpoq, taassuma kingorna Atuagagdliutit/Grønlandspostenimi tusagassiortunngorpoq, ukiunilu sisamani tassani atuuffeqarluni.
Taassuma kingorna Nuuk TV piugallarmat 2008-mi atorfinippoq. 2013-imilu KNR Qanoruumi aaqqissuisutut atorfinilluni.
2015-imi Radiumut nuuppoq, 2016-imilu aaqqissuisunngorluni.