Aleqap ukiortaami kissaataa: Nunatta nammineerluni aningaasarsiulernissaa
Aleqa Hammond aamma naliliisipparput, Nunatsinni aammalumi nunani allani, upernaaq manna tusagassiutitigut sammineqarnerpaanut ilaasoq, tassa Issittumi Siunersuisoqatigiit Norgemi illoqarfimmi Kirunami, maajip 15-anni ataatsimiinnerisa nalaani, Naalakkersuisut siulittaasuata ataatsimiinnermut peqataarusunnginnera, oqarluni issittoq pineqartillugu Kalaallit Nunaat tamassumunnga isumaqatigiinniartuullunilu akisussaaffeqartariaqaraluarmat, Danmarki pinnani.
- Issittumi Siunnersuisoqatigiinni isumaqatigiinniarnerni pingaarnerni nammineerluta issiaveqarluta isumaqatigiinniarsinnaanermik oqariartornerput aalajangerneruvoq pingaaruteqartoq. Upernaaq pisut qiviarukkit, taava allatut iliorsinnaasimanngilanga. Taamaattumik isumaqarpunga takkuniarnanga isummersimanngitsuuguma, taava maanna inissisimaffipput sanngiinnerulersimassagaluarpoq. Taamaattumik isumaqarpunga taamani aalajngernera eqqortuliornerusoq.
Naalakkersuisut siulittaasuata, Aleqa Hammondip naliliinermini pingaartippaa, Siumup aammalumi Naalakkersuisoqatigiit pilersinneqarnerata kingorna, Siumup partiillumi Naalakkersuisoqatigiilersut qineqqusaarnerminni neriorsuutitik arlaqartut piviusunngortissimaneri. Tupinnanngitsumik Nunatsinni aalisartunut neriorsuutaasimasut pingaaruteqarnerpaajusut, Naalakkersuisut siulittaasuata oqaatigaa.
- Nunatsinni aalisarnerup uneqattaartumik ingerlanneqannginnissa aamma pisassiissuteqaqqittarnissanik aalajangiisarnigut pillugit isumaqarpunga suliniarnitsinnut pitsaasumut tamanna takussutissiisoq.
Nunatta namminerisamik aningaasarsiulersinnaanera Naalakkersuisunit pingaartinneqarluarpoq tamannalu anguniarneqassasoq Aleqa Hammondip oqaatigaa. Tamannaannaanngilarli aamma aatsitassarsiornissamik pilersaarutit salliutinneqartunut ilaasut Aleqa Hammondip oqaatigaa.
- Aamma isumaqarpunga Nunatta aatsitassarsiornermik suliaqarumaneranut aalajangernermi pitsaasumik aalajangiisimalluta. Minnerunngitsumillu Nunatsinni ineriartornerup oqimaaqatigiissinneqarnissa pillugu aalajangiisimalluta. Tamannalu ilaatigit pingaarnerut angusaqarfigisimavarput.
Naalakkersuisunut ilaasortat, Aleqa Hammondillumi Naalakkersuisunut siulittaasunngornermi kingorna pingaartippaa nunat allat suleqatigisarnissaat. USA-mi Nunatta januaarip aallaqqaataanit aallarteqalernissaa pingaartutut oqaatigalugu.
- Nunatta aallartitaqalernissaanik aalajangernermi suleqatigisinnaasatsinnik isumaqatigiinniarfigisinnaasatsinnilu pilersitsisoqarpoq. Maannamiillu suliniutissatta tullerissavaa, aningaasarsiornikkut aamma Nunatsinni aningaasatigut atugarissaarnerulernissatsinnut aqqutissiuussinissaq.
Aleqa Hammondip naggataatigut oqaatigaa Nunatta aningaasaqarniarnerata imminut napatilersinnaanissaa, Namminersorlutik Oqartussat suliffeqarfii aamma suliffeqarfiit namminersortut peqatigalugit aningaasaqarnitta kivinneqarnissaa ukiumi nutaami, 2014-mi pilersaarutit annerpaartariagaat.
- Nunatsinni suliffissaaleqisut sulilersinnissaat siunertaraarput. Taamaattumik aalisarneruppat, inuussutissarsiuteqarneruppat, nunalerineruppat aamma sanaartorneruppat taakku taamaasa ataqatigiissaakkamik ingerlanneqarnissaat 2014-mi siunnerfigaarput pingaarnerpaatillugu.
Naalakkersuisut siulittaasuat, Aleqa Hammond taama naliliivoq.
