Aleqa: Sioorasaarineq akuersaarneqarsinnaanngilaq

Naalakkersuisoq Vittus Qujaukitsoq inatsisartunullu ilaasortaq ulluni kingullerni kissaammertarlutik oqqapput.

Oqallinneq aallartippoq, Vittus Qujaukitsup Inatsisartunit sulinngiffeqarnerminik taamaatitsilluni uterniarluni Per Berthelsenimut sioorasaarimmat, taamaaliornikkummi Per Berthelsen inatsisartunit tunuartariaqassammat.

Vittus Qujaukitsup sakkortuumik oqaaseqaarteqarnera pivoq, Per Berthelenip naalakkersuisoqarfimmi pisortap Jan H. Lyngep, Per Berthelsen naapertorlugu pikkorilluinnartuusup, soraarsitaaneranik isornartorsiuinerata kingorna.

Kingorna Per Berthelsen akivoq oqarlunilu isornartorsiunermut tunngavigineqartoq illarnaannartutullusooq ittoq aammalu killilersugaanani oqarsinnaatitaanermut saassussinerusoq.

Naalakkersuisup parteeqatiminik inatsisartunit anisitsiniarluni sioorasaarigaluartoq, Aleqa Hammondip tamanna sorujussuanngortinneqartariaqarsorinngilaa.

- Kimmaatilaartarnerput nutaajunngilaq. Partiiuvugut, taamatut misigisimagutta, immitsinnut isornartorsiornissatsinnut tunuarsimaarfiunngitsoq. Partiip iluani qinngasaarutilaartarnerit ajornartorsiuterujussuartut isiginngilakka, Aleqa Hammond oqarpoq.

Imminulli sioorasaarinissaq pissusissamisuunngitsoq naqissuserpaa, aammali naammagittarsinnaassutsip killeqarnera aamma oqaatigalugu.

- Pitsaasuunngilaq, aamma sioorasaarinissaq akuerineqarsinnaanngilaq. Isornartorsiuerusukkaanni, taava aamma tunngaveqarluartumik isornartorsiuinerusariaqarpoq. Aamma qinngasaarutissagaanni, killissarlu aalajangersimasoq tikikkaanni, taava aamma tamatuma kingunerisassai akuerineqartariaqarput, Aleqa Hammond oqarpoq.

Qanorli kinguneqarsinnaanera itisilerusunngilaa.