Aleqa nuliaasut akuersissutaannut suli isornartoqartitsivoq
Naalakkersuisut siuliini Naalakkersuisuni ilaasortat Kuupik V. Kleistip aamma Ove Karl Berthelsenip suliffeqarfinnut mikisunut aatsitassanik annikitsumik piiaasinnaanermut akuersissutaatitik nuliaminnut tunniummatigik, Aleqa Hammond taamani nipituuliorpoq, pisoq kammalaatersornerunerarlugu atorfimmilu ileqqorlunnerunerarlugu, erseqqissarlugulu tamanna ileqqorissaarnissamut tunngatillugu akuerineqarsinnaanngitsoq.
Taamaattumik Partii Inuit sinnerlugit Naalakkersuisuni ilaasortaasimasup Miiti Lyngep uia tunniukkusunngisaminik akuersissutaateqarnera paasineqarmat, Demokraatit eqqumiiginartippaat.
Taamaattumik siulittaasuat Jens B. Frederiksen paragraf 37 najoqqutaralugu tamanna pillugu siorna septembarip 23-anni apeqquteqarpoq. Maannalu kiisami akissuteqartoqarpoq.
Akissummi tamatumani Aleqa Hammondip erseqqissarpaa, qinikkat IA-meersut nuliaannut tunngasoq suli isornartoqartikkamiuk, namminerli naalakkersuisuutitami akornanni pisumut isornaroqartitsinani.
- Siusinnerusukkut isumaqarpunga aamma suli taama isumaqarlunga, pineqartut Naalakkersuisunut ilaasortaanerisa nalaani akuersissutinik pissarsinerat immikkut eqqumaffigissallugu tunngavissaqartoq, Aleqa Hammond akissummini allappoq.
Taassuma aamma erseqqissarpaa, uiusup imaluunniit nuliaasup soorlu Naalakkersuisut siulittaasuata nulia imaluunniit uia akuersissutaateqarpat, tamanna ileqqorissaarnissamut tunngatillugu akornutissaqarsorinngikkini.
Tamatumunnga atatillugu Aleqa Hammondip erseqqissarpaa, qinikkat IA-meersut nuliaannut atatillugu immikkut isiginiarneqarnerannut patsisaasoq tassaammat, aatsitassanut akisussaaffiup tigumminerata nalaani akuersissuteqartoqarsimanera.
Taamaattumik Miiti Lyngep uianut atatillugu pissutsit allarluinnaasut Aleqa Hammondip oqaatigaa, taannami Naalakkersuisuni ilaasortanngunngikkalarmalli akuersissut tunniunneqarsimammat.
Qularutigineqannginnissaa anguniarlugu Kuupik V. Kleist aamma Ove Karl Berthelsen akuersissutinik tunniussinermut atatillugu attuumassuteqarpallaarnertik pissutigalugu nuliaminnut akuersissuteqartoqalermat aalajangeeqataanngillat..
