Aleqa Hammondip saammaasseqatigiinneq aatsitassarsiorneq allarpassuillu ammaanermi sammivai
Nunatsinni kikkut sumi najugaqartussaanerannik Københavnimit aalajangerneqartarnerata nalaani inunngorlunilu peroriartorsimanini Naalakkersuisut siulittaasuata oqalugiaammini ilaatigut aallarniutigaa, nunaqarfinnik matooraasoqarnissamik Danmarkimit aalajangisoqartarsimanera eqqaasitsissutigalugu.
Peroriartorfimi Uummannap illoqarfittut attatiinnarneqarnissaa, Elisabannguaq Johansenip arnani siulliulluni Landsråditoqqamut ilaasortaanermini aalajangeeqataasimanera ilaatigut assersuutigaa.
Tassunga atatillugu eqqaamaneqassaaq nunaqarfiit katillugit taamaallaat 14,8 millionit koruuninik suliffissaqartitsiniarnernut atatillugu aningaasaliiffigineqarnissaat, aappaagumut aningaasanut inatsisissatut siunnersuummi takuneqarsinnaammat, aningaasaliissutissallu taakku ukiuni tulliuttuni aamma ikilineqartussatut siunnersuutigineqarmata.
Nunaqarfiillu ilaasa attatiinnarneqarsinnaanerisa apeqquserneqarsinnaanerat, Vittus Qujaukitsup Sermitsiamut qanittukkut oqariartuuteqarnera naammassiniarneqarnersoq maanna apeqqutaalerpoq.
Nunatta EF-imit 80-ikkunni aninera Aleqa Hammondip aamma eqqaavaa, aalisarnerup tungaatigut nammineq aalajangiisinnaassuseqalernerput eqqaasitsissutigalugu.
Nunatta soqutigisaasa sorsuutigalugillu illersortuarnissaannik Naalakkersuisunit pingaartinneqarnera, Aleqa Hammondip ammaanermi oqalugiaataani takuneqarsinnaavoq, Nunatta Issittumi Siunnersuisoqatigiinni suleqatigiiffimmi nunat tamalaat ilaasortaaffigisaanni peqataasinnaanissamut pisinnaatitaaffeqalernera assersuutigineqarluni. Pisut taamanikkut oqallisigineqangaatsiartut.
Naatitanik nammineq pilersorsinnaalernissatta pingaartinneqarnissaa, Naalakkersuisut siulittaasuata aamma taavaa, soorlu aamma Saammaateqatigiinnissamut Isumalioqatigiissitap suliassaasa pingaaruteqassusaat Aleqa Hammondip eqqaasitsissutigigaa.
