Aleqa Hammondip NATO’p allattaanera ataatsimeeqatigaa
NATO’p allattaanerata Anders Fogh Rasmussenip ullumi Naalakkersuisut Siulittaasuat, Aleqa Hammond, NATO’p Bruxellesimi qullersaqarfiani ataatsimeeqatigaa. Ataatsimeeqatigiinnermi NATO’p allattaanerata suliat pingaarnerit kiisalu NATO’p Issittumut tunngatillugu inissisimanera saqqummiuppai, Nunatta Bruxellesimi Aallartitaqarfia taama allappoq.
Allattaanerup erseqqissarpaa, Issittumi ineriartorneq pissusissamisoortumik NATO’mi oqaluuserisassanut ilaasoq, tassami NATO’p nunat ilaasortat Issittumi naalagaaffiummata. Immaatigut aqqutit annertunerulernerat Issittumilu isumalluutit, silaannaap allanngornerata kingunerisaanik, avannamut annertunerusumik samminissamut pissutissaqartitsipput.
Allattaanerup ilisimatitsissutigaa, NATO’p tunngaviusumik Issittumi najuunnini annertusinianngikkaa. Issittumi Siunnersuisoqatigiiat Naalagaaffiillu Peqatigiit suliat Issittumi pineqartut pillugit isumaqatigiinniarfissatut isigineqarput. Ujarlerneq aamma Annaassiniarneq (SAR) Issittumi immikkut ittumik unammilligassatut saqqummiunneqarpoq, tassani nunat Issitumiittut akunnerminni kiisalu NATO’mik suleqateqarnerup annertusarneqarnissaa eqqartorneqarluni.
Naalakkersuisut Siulittaasuata qularutigeqqunngilaa, Issittumi suleqatigiinnermut atatillugu Issittup, Ilulissani Nalunaarummi 2008-meersumi erseqqissarneqarsimasup, sakkutooqalernissaa kissaatigineqanngitsoq. Tamatuma saniatigut Naalakkersuisut Siulittaasuata Kalaallit Nunaanni aatsitassarsiorneq pillugu ineriartorneq ilisimatitsissutigaa.
Naggasiullugu allattaanerup ingerlaavartumik oqaloqatigiinnissap pingaaruteqarnera erseqqissarpaa kiisalu Kalaallit Nunaanni Namminersorlutik Oqartussat NATO’llu ataatsimeeqatigiittuarnissaat inassutigalugu.
