Aleqa Hammond: USA-mik suleqateqarneq alloriarneruvoq pingaaruteqartoq
OBS: USA-p nunattalu akornanni suleqatigiinnissamut Danmark peqataatinneqarsimanngitsoq ilanngutassiami siusinnerusukkut allaatigineqarpoq, taamaattoqanngilarli. Tamanna erseqqissarneqarpoq.
Nunarput USA-mik suleqateqarnissamut sisamanngormat akuersivoq.
Naalakkersuisullu nunamik allamik isumaqatigiissusiornerat politikkikkut alloriarneruvoq pingaarutik.
Nunanut allanut sillimaniarnermullu ataatsimiititaliami siulittaasoq, Aleqa Hammond taama naliliivoq.
- Isumaqarpunga alloriarneq taanna politikkikkut ineriartornermi pitsaasuusoq, taanna oqarpoq.
- Siullermeertumik uanga takuvunga nunatta naalakkersuisui nunanut allanut toqqaannartumik isumaqatiginnininiarnermik inerniliinermik qaqitsisoqartoq Danmark aqqusaaqqaanngikkaluarlugu, Aleqa Hammond (NQ) oqarpoq.
Nunarpulli USA-mit millioninik akuersinissamut kisimiinngilaq. Danskit naalakkersuisui suliami aamma peqataasut, amerikamiut aallartitaata, Carla Sandsip paasissutissiissutigaa.
Isumaqatigiissuteqarnikkut USA-p naalakkersuisui nunatsinnut suliniutinut 12,1 millionit dollarinik tassa 83 millionit koruunit missaannik tunniussaqarpoq.
AAMMA ATUARUK Nunarput USA-lu koruuninik millionilikkaanik nalilinnut suleqatigiissasut
USA-p aningaasat aatsitassaqarnermut, takornariaqarnermut ilinniartitaanermullu atorneqartikkusuppai. Naalakkersuisulli suliap ingerlanneqarnera nunatta qanimut suleqatigineratigut ingerlanneqarnissaa pingaartuutippaat.
Aningaasat amerikamiut immikkut ilisimasallit siunnnersuinerannut ilaatigut atorneqarnissaat naatsorsuutaavoq.
Isumaqatigiissut "pitsaasuusoq" suleqatigiinnerlu nunatsinnut suliniutinut aningaasaliinikkut ersersinneqassasoq, Naalakkersuisut siulittaasuata Kim Kielsenip (S) tusagassiutinut ippassaq nalunaarutigaa.