Aleqa Hammond: Naalakkersuisut inatsisit naapertorlugit sulipput
Naalakkersuisut siulitaasuata Aleqa Hammondip Inatsisartunit ippassaq apeqqarissaarfigineqarsinnaanerata nalaani, Jens B. Frederiksenip parteeqataata Palle Christiansenip apeqqutigaa Aleqa Hammondip Naalakkersuisut siulittaasoqarfia arlaannaannulluunniit attuumassuteqanngitsunit misissortinniarneraa. Nunattammi avataanit isigineqarnera innarlerneqarsinnaavoq Naalakkersuisoqarfinni atorfinitsitsisarnerit apeqquserneqarsinnaappata, Demokraatit siulittaasuat Jens B. Frederiksen oqarpoq.
- Taamaaliunngikkutta uagut Nunarput tusaamasaanerlugaassaaq, tusaamanerlugaalereerporlu. Tamannalu unitsinneqassappat, taava misissuinissaq pisariaqarpoq. Taassuma saniatigut Namminersorlutik Oqartussat tatigineqarsinnaanissartik pisariaqartippaat, atorfilittaallumi aamma, Demokraatit siulittaasuat Jens B. Frederiksen oqarpoq.
Inuit Ataqatigiillu siulittaasuata Kuupik V. Kleistip Demokraatit isumaqatigai:
- Uaguinnaanngitsoq, kisianni naliginnaasumik innuttaaqatigiit akornatsinni toqqissisimasoqanngilaq, aamma minnerunngitsumik sulisut akornanni toqqissisimasoqanngilaq pissutsit taamaanneranni, taamaammat taamatut misissuisitsinikkut qulaajaasoqartariaqarpoq. Paasisariaqarparput susoqarnersoq, ingerlatsineq sutigut equsoorsimanersoq, tamatumalu kingorna eqqortumik ingerlatsinissamut tunngavissiilluta, Inuit Ataqatigiit siulittaasuat Kuupik V. Kleist oqarpoq.
Inatsisit tunngavigalugit pisussaaffiillu naapertorlugit Naalakkersuisut ingerlatsisut, Aleqa Hammondip Palle Christiansenimut akissuteqaateqarnermini ilaatigut oqaatigaa, Naalakkersuisullu suleriaasiisa apeqquserneqarnerat illuatungilerlugu:
- Uagut uppernanngitsunngortitsiniaanermik aammalu inupiluuserpaluttumik eqquungitsumik ingerlatsiniartumik oqaluuserineqarnerput illuatungilertariaqarlugu misigisimavunga. Naalakkersuisut siulittaasoqarfiani sulisitsivugut inatsisitigut uppernarsarneqassasoq ilumut taamatut pisuutitsiniutit ilumoortortaqarnersut, Aleqa Hammond oqarpoq, nangillunilu:
- Naalakkersuisut siulittaasuata akisussaaffeqarnerani sulisoqarnermut tunngatillugu iliuuserisarput inatsisit malinneqartut tunngavigalugit ingerlatsiffiusoq, suliap inerneraa. Soorlu aamma inatsisit taakku ilissi naalakkersuisuugallarassi malikkisi, Naalakkersuisut siulitaasuat Aleqa Hammond oqarpoq.
Qanorpiaq sunalu misissorneqassanersoq Inatsisartut Kukkunersiuinermut Ataatsimiititaliaata Naalakkersuisullu isumaqatigiissutigissagaat, Jens B. Frederiksenip takorloorpaa, taamaalisoqanngippat suliap tatiginartumik naammassineqarsinnaanissaa ajornakusuussanerarlugu.
