Aleqa Facebookkikkut nassuiaateqartoq
Aleqa Hammondip nammineq aningaasaqarnini Ekstra Bladetimut oqaaseqarfigerusunngilaa, aningaasallu atorsimasani utertissimanerlugit aperineqarami aamma tamanna akiumanngilaa. Facebookimili quppernermini maanna nassuiaateqarpoq.
- Ullumikkut oqaasissakka takkajaajupput uannit tusarnissarsi pingaaruteqarmat, Aleqa Hammond taama allappoq:
- Juunimi kortikka itunes aqqutigalugu annertuumik atornerlunneqarsimapput qujanartumik bankima paasisaanik sukkasuumillu iliuuseqarfigisaanik. Matuneqartariaqarlutik nutaanillu qinnuttariaqarlunga. Folketingimiit mastercardeqartinneqarpunga aallaqqaataaniilli kisiannili atunngisaannarsimasannik, ajornartoornermi atortariaqarakku allaffeqarfik ilisimatippara paaseqatigiipugullu pisoq pillugu, Aleqa Hammond taama allappoq.
Aamma atuaruk Tusagassiuut: Aleqa Hammond akileraartartut aningaasaataannik atornerlueqqittoq
- Ajoraluartumik allaffeqarfimmiit allaqatigiinnerput kukkusumik susassaqangitsumut kopeerneqarsimapput taassumalu ekstrabladet tusagassiortuinut ingerlateqqissimavaa. Uannit allaffeqarfimiillu ajuusaarutigineqaqisumik.
- Ajortussarsiornermik atornerluiniarnermillu siunertaqanngisaannarpoq kisiannili tusagassiortut mamarissaqigaat nalunngilara. Uummammiukka ilissinnut apuuppakka, Aleqa Hammond taama naggasiivoq.
Aleqa Hammond oqaaseqartinniarlugu KNR-imit oqarasuaatikkut sianerfigisaraluaratsigu ajoraluartumik iluatsinngilarput.
Aleqa Hammondip kontuanit atukkat assilinerat, Folketingip allattoqarfiata e-maileruutaaneersoq, aviisimillu Ekstra Bladetimit pissarsiarineqarsimasoq. (Asseq: Ekstrabladet).
