Aleqap akiitsoqarnini nassuerutigaa
- Pisassaqaaluppunga, tassami Folketingip allattoqarfia oqaloqatigissavara qulaajagassat arlaqarmata. Tusagassiuutitigut allakkulluunniit oqallinneq pinngitsoorniarlugu allattoqarfik ataatsimeeqatiserinikuuara, Aleqa Hammond KNR-imut oqarpoq.
Tamanna pivoq Aleqa Hammondip folketingip kreditkortia atorlugu 13.000 koruuningajaat nalinganut pisiniarsimanera Ekstrabladet-ip nittartagaani sapaatiummat saqqummiunneqarmat.
Aamma atuaruk Tusagassiuut: Aleqa Hammond akileraartartut aningaasaataannik atornerlueqqittoq
Aleqa Hammondip nassuiaatiginikuuaa nammineq kortini atornerlunneqarsimanerata kingorna Folketingimi sulinerminut atatillugu kreditkorterisani atortariaqarsimallugu. Facebookimini aamma nassuiaatigaa folketingimi allattoqarfik korteq atortariaqarneranik ilisimatissimallugu paaseqatigiissimallutillu.
Aamma atuaruk Aleqa Facebookkikkut nassuiaateqartoq
Folketingip allattoqarfiata suliaq maanna misissuleruttorpaa.
Suna Aleqa Hammondip allattoqarfiullu paaseqatigiissutigisimaneraat inuttaata KNR-imut erseqqissarumanngilaa.
Maluginiarneqarnini paasisinnaagaa
Hammondip maluginiarneqarnini pissusissamisoorsoraa.
- Soorunami innuttaasut qisuariaataat paasisinnaavakka, aamma isornartorsiuisut paasisinnaavakka. Taassumalli saniatigut tunuliaqutsiisorpassuaqarpoq.
- Pisoq killiffigisara nuanninngilaq. Eqqissisimaniartariaqarpungali ajornartorsiullu aaqqillugu, Aleqa Hammond oqarpoq.
Aperineqarami qinikkatut pisortat aningaasaataannut tunngasunik immikkut ittumik akisussaaffeqarnerluni KNR-imut ima akivoq:
- Soorunami pisussaaffeqarpugut qinikkatut piffissaq qanoq isigaangalluunniit malitassagut malissallutigit.
- Aamma ilaannikkooriarluni, qanorluunniit artornartigigaluarpata aqqusaagassagut, tamakkua aamma suliarisussaavavut.
- Isumaqarpungalu aamma uani pisoqartuni, nuanniittumik pisumi, susassaqavittut uangalu ataatsimoorluta aaqqitassat aaqqittariaqarivut. Allaqquunneqarsinnaanngilaq, soorunami aamma taamaattussaavoq, taannalu suliassara ingerlatissuara, Aleqa Hammond oqarpoq.
