Alcoap aatsitsiviani qaartoorujussuartut

Arfininngormat ualikkut nalunaaqutaq tallimanut Island-imi Alcoap aatsitsivissua sakkortuumik qaartoorfiuvoq. Qaartoornermi innaallagissap aqqutai eqqorneqarput.

Qaartoornerup kinguneranik annertuumik ikuallattoqarpoq tamatumalu eqqaa tamarmi innaallagiaarukkaluarluni - taamaattorli sulisunik ajoqusertoqanngilaq.

Alcoap Islandimi oqaaseqartartua Erna Indridadottir naapertorlugu suli ilisimaneqanngilaq suna qaartoornermut pissutaanersoq. Nittartakkakkut nutaarsiaqartitsivik visir.is allappoq paasiniaaneq qaammatinik arlalinnik sivisussuseqarsinnaasoq.

Indridadottir visir.is naapertorlugu oqarsimanerarneqarpoq taama sakkortutigisumik qaartoortoqartarnera qaqutigoorpoq maannali aatsitsivissuaq tamakkiisumik ingerlaqqilereersoq unnersimavaa naak aallarteqqinniarnera kigaalasimagaluartoq.

Taamaammat Alcoa iluatsitsisimaqaaq. Aatsitsivissuarmi innaallagiaqarani sivisunerusumik uninngasimagaluarpat aatsitaat atortut iluanni issorsimassagaluarpoq taamalu atortut aserorlugit tamannalu dollarsinik millionilikkaanik akeqarsimassagaluarpoq.

Tassani qatserisartuusut Islandimi tusagassiorfinnut oqaluttuarput qaartoorneq ajornerusumik kinguneqarsimasinnaalluaraluartoq. Qaartoorneq sakkortummat aatsitsivissuarmilu uulia annertooq uninngasuulluni ajorluinnartumik kinguneqarsimasinnaagaluarpoq.

Islandimi immikkut ilisimasallit saniatigut nunanit allaneersunik misissuinermi ikiuuttussanik pissarsisoqarsimavoq.